എൻജിനിയറിങ്ങാണ് പഠിച്ചതെങ്കിലും എന്തിനാണ് പഠിച്ചതെന്ന് ഇപ്പോഴും ഒരുറപ്പില്ലാത്ത കാര്യമാണെന്ന് നടൻ നിവിൻ പോളി. ഒരു ബിസിനസോ സ്റ്റാർട്ട്അപ്പോ തുടങ്ങണമെന്നത് പഠിക്കുന്ന കാലംതൊട്ടേയുള്ള ആഗ്രഹമായിരുന്നു എന്നും നടൻ പറഞ്ഞു. കൊച്ചിയിലെ കേരള സ്റ്റാർട്ട് അപ് മിഷനിൽ ‘ഹാക്ജെൻ എഐ 2025’ ലോഗോയും വെബ് സൈറ്റും ലോഞ്ച് ചെയ്തശേഷം സംസാരിക്കുകയായിരുന്നു നടൻ.
‘സ്റ്റാർട്ട് അപ്പുകളെ പിന്തുണയ്ക്കാൻ വേണ്ടി എന്തെങ്കിലും ചെയ്യാൻ കഴിയുക എന്നത് ഒരുപാട് വർഷത്തെ ആഗ്രഹമാണ്. എൻജിനിയറിങ്ങാണ് പഠിച്ചതെങ്കിലും അത് എന്തിനാണ് പഠിച്ചതെന്ന് ഇപ്പോഴും ഒരു ഉറപ്പില്ലാത്ത കാര്യമാണ്. ഒരു ബിസിനസോ സ്റ്റാർട്ട് അപ്പോ തുടങ്ങണം എന്നത് പഠിക്കുന്ന കാലംതൊട്ടേയുള്ള ആഗ്രഹമായിരുന്നു. ഒരുപാട് ചർച്ചകൾ നടത്തിയിട്ടുണ്ട്. ചർച്ചകൾ നടന്നുവെന്നല്ലാതെ പ്രായോഗികമായി ഒന്നും മുന്നോട്ടുപോയില്ല. ആവശ്യമായ പിന്തുണയൊന്നും അന്ന് ലഭിച്ചില്ല’.
‘പിന്നീട് ഭാഗ്യംകൊണ്ട് സിനിമയിൽ എത്തി. സിനിമയിൽ തിരക്കായി. ഇടയ്ക്ക് ഓരോ സ്റ്റാർട്ട് അപ്പ് ഐഡിയകൾ കേൾക്കും. സ്റ്റാർട്ട് അപ്പുകളെ പിന്തുണയ്ക്കുന്ന പരിപാടി തുടങ്ങണം എന്നത് ഒരുപാട് കാലത്തെ ആഗ്രഹമായിരുന്നു. സിനിമയിൽ ഞങ്ങൾ അഭിമുഖീകരിക്കുന്ന ഒരുപാട് പ്രശ്നങ്ങളുണ്ട്. അവയെക്കുറിച്ച് ആളുകളോട് ചർച്ച ചെയ്യുമായിരുന്നു. സിനിമാ നിർമാണത്തെ സഹായിക്കുന്ന എഐ ടൂളുകൾ നിർമിക്കാൻ ശ്രമിച്ചിരുന്നു’എന്നും നിവിൻ കൂട്ടിച്ചേർത്തു.