റിപ്പബ്ലിക് ഓഫ് ഇന്ത്യ എന്നത് മാറ്റി റിപ്പബ്ലിക് ഓഫ് ഭാരത് എന്നാക്കി മാറ്റിയേക്കുമെന്ന അഭ്യൂഹങ്ങള്‍ക്കിടെ കൗതുകകരമായ പ്രതികരണവുമായി നടന്‍ ഹരീഷ് പേരടി. ബോംബെയ്ക്ക് മുംബൈയും മദ്രാസിന് ചെന്നൈയുമാകാമെങ്കില്‍ ഇന്ത്യക്ക് ഭാരതമാകാന്‍ പാടില്ലേ. ഭാരതം ഒട്ടും മോശപ്പെട്ട പേരല്ല, അത് ഇന്ത്യക്കാരുടെ വേരുകള്‍ക്ക് കൂടുതല്‍ ബലം നല്‍കും. നാഷണല്‍ അവാര്‍ഡ് നേടിയ നടന്മാര്‍ പേരിന് മുന്നില്‍ ഭരത് എന്ന് ചേര്‍ത്തിരുന്നു അവര്‍ സംഘികളാകുമോ എന്നാണ് നടന്‍ ചോദിക്കുന്നു.
ഹരീഷ് പേരടിയുടെ കുറിപ്പ്:
ഭാരതമെന്നപേര്‍ കേട്ടാലഭിമാന പൂരിതമാകണമന്തരംഗം കേരളമെന്നു കേട്ടാലോ തിളയ്ക്കണം ചോര നമുക്കു ഞരമ്പുകളില്‍’…ചൊല്ലിയത് മഹാകവി വള്ളത്തോളാണ്… ഇനി ഈ മഹാകവിയേയും കാലം സംഘിയാക്കുമോ… ബോംബെക്ക് മുംബൈയാവാം… മദ്രാസിന് ചെന്നൈയാവാം… പക്ഷെ ഇന്ത്യക്ക് ഭാരതമാവാന്‍ പാടില്ലത്രേ..
ഭരത് അവാര്‍ഡ് നിര്‍ത്തിയതിനു ശേഷവും നാഷണല്‍ അവാര്‍ഡ് കിട്ടിയ നടന്‍മാരൊക്കെ ജാതി മതഭേദമന്യേ അവരുടെ പേരിന്റെ മുന്നില്‍ ഭരത് എന്ന് അഭിമാനത്തോടെ ചേര്‍ത്തിരുന്നു… നാളെ മുതല്‍ അവരെയൊക്കെ നമ്മള്‍ സംഘികള്‍ എന്ന് വിളിക്കേണ്ടി വരുമോ… വ്യക്തികള്‍ക്ക് മതവും പേരും മാറാന്‍ ഭരണഘടന അനുവാദം നല്‍കുന്ന രാജ്യത്ത്..
രാജ്യത്തിന് മാത്രം പേര് മാറാന്‍ അനുവാദമില്ലാതിരിക്കുമോ… അങ്ങിനെയാണെങ്കില്‍ അത് ജനാധിപത്യമാവില്ല… കാരണം ജനാധിപത്യം ജനങ്ങള്‍ക്കും അവരുടെ വാസസ്ഥലത്തിനും ഒരു പോലെ അവകാശപ്പെട്ടതാണ്.. ഭാരതം… ഒട്ടും മോശപ്പെട്ട പേരുമല്ല… ആ പേര് ഇന്ത്യക്കാരായ എല്ലാവരുടെയും വേരുകള്‍ക്ക് കൂടുതല്‍ ബലം നല്‍കുന്നതുമാണ്.. എനിക്ക് ഇന്ത്യയും ഭാരതവും ഒരു പേരാണ്..