മമ്മൂട്ടിയെ നായകനാക്കി റത്തീന പി ടി ഒരുക്കിയ പുഴു കഴിഞ്ഞ ദിവസമാണ് ഒടിടി പ്ലാറ്റ്ഫോമായ സോണി ലിവിലൂടെ റിലീസ് ചെയ്തത്. ചിത്രത്തിന് മികച്ച പ്രതികരണമാണ് കിട്ടുന്നത്. പാര്വതി തിരുവോത്താണ് ചിത്രത്തില് നായിക. ജാതിരാഷ്ട്രീയവും, ദുരഭിമാനവുമൊക്കെയാണ് ചിത്രം ചര്ച്ച ചെയ്യുന്നത്.
ചിത്രത്തില് പ്രധാനപ്പെട്ട ഒരു വേഷത്തില് അപ്പുണ്ണി ശശിയും എത്തുന്നുണ്ട്. താരത്തിന്റെ പ്രകടനത്തെ കുറിച്ചും മികച്ച അഭിപ്രായങ്ങള് പുറത്തുവരുന്നുണ്ട്. നാടക വേദികളില് നിന്നും സിനിമയിലേക്ക് ചുവടുവെച്ച നടന് തന്റെ കഥാപാത്രത്തെ മികവുറ്റതാക്കിയെന്നാണ് പ്രേക്ഷക പ്രതികരണം.
ഇപ്പോഴിതാ, അപ്പുണ്ണി ശശിയെ അഭിനന്ദിച്ച് നടന് ഹരീഷ് പേരടി കുറിച്ച വാക്കുകളാണ് ശ്രദ്ധേയമാകുന്നത്. ഫേസ് ബുക്ക് പോസ്റ്റിലൂടെയാണ് ശശിക്ക് അഭിനന്ദനം അറിയിച്ച് ഹരീഷ് രംഗത്തെത്തിയത്. ‘ശശിയെ മലയാള സിനിമ തിരിച്ചറിയുന്നു. പുഴു എന്നിലുണ്ടാക്കുന്ന ആഹ്ലാദം അതുതന്നെയാണ്. മലയാളത്തിന്റെ എന്നും ഓര്മ്മിക്കപ്പെടുന്ന കുട്ടപ്പനായി അവന് ഇങ്ങിനെ വണ്ടിയോടിച്ച് കയറുന്നത് പുതിയ ശക്തമായ കഥാപാത്രങ്ങളിലേക്കാണെന്ന് എനിക്കുറപ്പുണ്ട്. ശശീ. നാടകസലാം’, ഹരീഷ് പേരടി കുറിച്ചു.