ഉടല്, കുടുക്ക് എന്നീ സിനിമകളിലെ ചില രംഗങ്ങളുടെ പേരില് നടി ദുര്ഗ കൃഷ്ണയ്ക്കെതിരെ കടുത്ത സൈബര് ആക്രമണമാണ് സോഷ്യല്മീഡിയയില് നടക്കുന്നത്. ഇപ്പോഴിതാ വിഷയത്തില് തന്റെ നിലപാട് വ്യക്തമാക്കിയിരിക്കുകയാണ് നടി. മനോരമയുമായുള്ള അഭിമുഖത്തില് അവര് ഇക്കാര്യത്തെക്കുറിച്ച് പറയുന്നതിങ്ങനെ.
ദുര്ഗ്ഗയുടെ വാക്കുകള്
എന്റെ സ്വപ്നമാണ് മണിരത്നം സാറിന്റെ ഒരു ചിത്രം. ഒരു ലിപ്പ്ലോക്ക് ഉള്ളതിന്റെ പേരില് എന്നെങ്കിലും എനിക്ക് അത്തരമൊരു അവസരം വന്നാല് ഞാനത് ഉപേക്ഷിക്കേണ്ട ആവശ്യമുണ്ടോ? ലിപ്പ്ലോക്ക് മാത്രമല്ല കുടുക്ക് എന്ന ചിത്രത്തില് ഞാന് ചെയ്തിട്ടുള്ളത് സംഘട്ടനരംഗങ്ങളുമുണ്ട്. അതൊന്നും ആരും പറയില്ല.
എന്റെ അഭിനയം മോശമാണെങ്കില് വിമര്ശിക്കാനുള്ള സ്വാതന്ത്ര്യമുണ്ട്. എന്നാല് വിമര്ശനങ്ങള് പലപ്പോഴും എന്റെ കുടുംബാംഗങ്ങള്ക്ക് നേരെയാണ്. വിവാഹം കഴിഞ്ഞതുകൊണ്ട് ഭര്ത്താവ് കയറൂരി വിട്ടിരിക്കുകയാണോ? എന്നെ വിറ്റ് ജീവിക്കുകയാണോ? തുടങ്ങി മോശമായ കമന്റുകളാണ് വരുന്നത്.
എന്റെയൊപ്പം എല്ലാ പിന്തുണയുമായി ഭര്ത്താവ് ഒപ്പമുണ്ട്. പക്ഷെ ഈ വിമര്ശനം കാരണം ഏതെങ്കിലും ഒരു പോയിന്റില് ഞാന് അഭിനയിക്കേണ്ട എന്ന് അദ്ദേഹം പറഞ്ഞാല് എന്റെ സ്വപ്നം അതോടെ ഇല്ലാതെയാകും. ഈ പ്രതിസന്ധിനേരിടുന്ന ഒരുപാട് അഭിനേത്രികളുണ്ട്.