ഷാഫിയുടെ സംവിധായത്തില് മമ്മൂട്ടി നായകനായി 2007 ല് പുറത്തിറങ്ങിയ ചിത്രമാണ് മായാവി. ഹാസ്യത്തിന് പ്രധാന്യം നല്കി ഒരുക്കിയ ചിത്രം മികച്ച വിജയമാണ് നേടിയത്. ഇരുട്ടടിക്കാരാനായ മഹി എന്ന കഥാപാത്രത്തെയാണ് ചിത്രത്തില് മമ്മൂട്ടി അവതരിപ്പിച്ചത്. മായാവിയുടെ കഥ പറയാന് മമ്മൂട്ടിയുടെ അടുത്ത് ചെന്നത് പേടിയോടെയാണെന്ന് വെളിപ്പെടുത്തിയിരിക്കുകയാണ് ഷാഫി. അതിനുള്ള കാരണവും ഷാഫി പറയുന്നു.
“ആന്റോ ജോസഫ് ആണ് പറഞ്ഞത് മമ്മൂക്കയുടെ അടുത്ത് മായാവിയുടെ കഥ ഒന്ന് സൂചിപ്പിച്ചു നോക്കാം എന്ന്. “ഇരുട്ട് അടി സര്വീസ്”, ഐ.എ.എസ്” എന്നൊക്കെ പറഞ്ഞു പുതിയ രീതിയിലുള്ള അവതരണമാണ് നടത്തിയത്. മമ്മൂക്കയുടെ അടുത്ത് ചെല്ലുമ്പോള് ചെറിയ സംശയവും പേടിയുമുണ്ടായിരുന്നു.”
“കാരണം സിനിമയിലെ ഹീറോ ഇരുട്ടടിക്കാരനാണ്, പ്രേക്ഷകര്ക്ക് മുന്നില് അയാളൊരു ഹീറോ ആണെങ്കിലും ചിത്രത്തിലെ കഥാപാത്രങ്ങള്ക്ക് മുന്നില് മഹിക്ക് ഒരു വിലയുമില്ല. സലിം കുമാര് അവതരിപ്പിക്കുന്ന കഥാപാത്രമടക്കം അയാളെ പേടിപ്പിച്ചു നിര്ത്തുകയാണ്. മെഗാസ്റ്റാര് പദവിയിലിരിക്കുന്ന മമ്മൂക്കയ്ക്ക് ഇത് ഇഷ്ടമാകുമോ എന്നതായിരുന്നു പേടി. ആദ്യ കേള്വിയില് തന്നെ അദ്ദേഹം സമ്മതം മൂളി.” മാതൃഭൂമി സ്റ്റാര് ആന്ഡ് സ്റ്റൈലിന് നല്കിയ അഭിമുഖത്തില് ഷാഫി പറഞ്ഞു.