2020 ല് മലയാളത്തില് ഇറങ്ങിയ സിനിമകളില് മികച്ച പ്രതികരണം നേടിയ ചിത്രങ്ങളിലൊന്നായിരുന്നു വരനെ ആവശ്യമുണ്ട്. സത്യന് അന്തിക്കാടിന്റെ മകന് അനൂപ് സത്യന് ആയിരുന്നു ചിത്രത്തിന്റെ സംവിധായകന്. ജോണി ആന്റണിയും ചിത്രത്തിലെ പ്രധാന കഥാപാത്രത്തെ അവതരിപ്പിച്ചിരുന്നു. ഡോ. ബോസ് എന്നായിരുന്നു അദ്ദേഹത്തിന്റെ കഥാപാത്രത്തിന്റെ പേര്. ജോണി ആന്റണി ഷൂട്ടിംഗ് സെറ്റിലും വളരെ പോസിറ്റീവായിരുന്നെന്ന് അനൂപ് പറയുന്നു.
“ജോണി ചേട്ടന്റെ സീന് ഷൂട്ട് ചെയ്യാനുണ്ടെങ്കില് ഒരു കോമഡി സിനിമ കാണുന്ന മൂഡിലാണ് ലൊക്കേഷനിലേക്ക് ചെല്ലുക. എല്ലാത്തിലും ഹ്യൂമറാണ്. സി.ഐ.ഡി. മൂസ എന്ന സിനിമ സംവിധാനം ചെയ്ത സംവിധായകനാണ്. അതുകൊണ്ടു തന്നെ അപാര ടൈമിംഗാണ്. നമ്മള് കട്ടെന്ന് പറയുന്നത് തന്നെ ചിരിച്ചു കൊണ്ടായിരിക്കും,” അനൂപ് പറയുന്നു.
സിനിമയില് ഈ ക്യാരക്ടറിനെ മാത്രമാണ് കെട്ടഴിച്ച് വിട്ടതെന്നും അനൂപ് കൂട്ടിച്ചേര്ത്തു. ആക്ഷന് തുടങ്ങി കഴിഞ്ഞാല് നമ്മളെ സര്പ്രൈസ് ചെയ്യിക്കുന്ന ഒരുപാട് കാര്യങ്ങള് ജോണിയില് നിന്ന് കിട്ടുമെന്നും അദ്ദേഹം പറഞ്ഞു.