ശ്രീദേവിയും ഭർത്താവ് ബോണി കപൂറും ഇപ്പോഴും വാർത്തകളിൽ നിറഞ്ഞുനിൽക്കാറുണ്ട്. അടുത്തിടെ ശ്രീദേവിയുടെ മരണകാരണം വെളിപ്പെടുത്തി ബോണി കപൂർ രംഗത്തുവന്നിരുന്നു. ഇപ്പോഴിതാ വിവാഹത്തെ പറ്റിയും ജാൻവി കപൂറിന്റെ ജനനത്തെ പറ്റിയും തുറന്നുപറഞ്ഞിരിക്കുകയാണ് ബോണി കപൂർ.
യഥാർത്ഥത്തിൽ 1996 ജൂണിലാണ് തങ്ങളുടെ വിവാഹം കഴിഞ്ഞതെന്നും എന്നാൽ 1997 നാണ് ദാമ്പത്യം ഔദ്യോഗികമാക്കിയതെന്നും ബോണി കപൂർ പറഞ്ഞു. ശ്രീദേവിക്കും ബോണി കപൂറിനും രണ്ട് മക്കളാണുള്ളത്. ബോളിവുഡ് നായികയായ ജാൻവി കപൂറും, ഖുഷി കപൂറും.
1996 ജൂണ് 2 ന് ഞങ്ങൾ വിവാഹിതരായി. എന്നാൽ അത് ലോകത്തോട് വെളിപ്പെടുത്തിയത് ജനുവരിയിലാണ്. ശ്രീദേവി ഗർഭിണിയായി വയർ പുറത്തുകാണാൻ തുടങ്ങിയപ്പോഴാണ് വിവാഹകാര്യം ഔദ്യോഗികമാക്കിയത്. അങ്ങനെ ജാൻവി വിവാഹത്തിന് മുന്നെ ഉണ്ടായ കുട്ടിയെന്ന തരത്തിൽ കഥകളിറങ്ങി.” ഇന്ത്യൻ എക്സ്പ്രസിന് നൽകിയ അഭിമുഖത്തിലാണ് ബോണി കപൂറിന്റെ പുതിയ വെളിപ്പെടുത്തൽ.
2018 ഫെബ്രുവരി 24 നാണ് ശ്രീദേവിയെ ദുബായിലെ ഹോട്ടൽ മുറിയിലെ ബാത്ത്റൂമിൽ മരിച്ച നിലയിൽ കണ്ടെത്തിയത്. ഭക്ഷണത്തിലെ ഉപ്പ് പാടെ ഒഴിവാക്കിയുള്ള ഡയറ്റാണ് ശ്രീദേവി പിന്തുടർന്നിരുന്നത് എന്നും അതുകൊണ്ട് തന്നെ ഇടയ്ക്കിടെ ബോധക്ഷയം ഉണ്ടാവുമായിരുന്നെന്നും ബോണി കപൂർ പറഞ്ഞിരുന്നു. ശ്രീദേവിയുടെ മരണത്തെ സംബന്ധിച്ച് കുറേകാലം മൌനത്തിലായിരുന്നതിന് ശേഷമാണ് ഈ വെളിപ്പെടുത്തൽ നടത്തിയത്.
