ലിവിംഗ് ടുഗദര് പങ്കാളിയില് നിന്ന് തനിക്ക് വധഭീഷണിയുണ്ടെന്ന് വെളിപ്പെടുത്തി നടിയും ട്രാന്സ്ജെന്ഡറുമായ അഞ്ജലി അമീര്. ഫെയ്സ്ബുക്ക് ലൈവിലൂടെയാണ് അഞ്ജലി ഇക്കാര്യം വെളിപ്പെടുത്തിയത്. ബന്ധം പിരിഞ്ഞാല് അയാള് കൊല്ലുമെന്നും മുഖത്ത് ആസിഡ് ഒഴിക്കുമെന്നും ഭീഷണിപ്പെടുത്തുന്നെന്നും ആത്മഹത്യയുടെ വക്കിലാണ് താനെന്നും വീഡിയോയില് അഞ്ജലി പറയുന്നു.
“കുറച്ച് നാള് മുമ്പ് ഞാനൊരു പോസ്റ്റ് പങ്കുവെച്ചിരുന്നു. ഒരാള് എന്നെ വല്ലാതെ വിഷമിപ്പിക്കുന്നു, മാനസികമായും ശാരീരികമായും ഉപദ്രവിക്കാന് ശ്രമിക്കുന്നതായി പറഞ്ഞിരുന്നു. എനിക്ക് ഒരു തരത്തിലും ഇഷ്ടമില്ലാത്ത വ്യക്തിയുമായി പല സാഹചര്യങ്ങള് കൊണ്ട് ലിവിംഗ് ടുഗദെറില് ഏര്പ്പെടേണ്ടി വന്നിരുന്നു. എനിക്ക് ഒട്ടും താല്പര്യമില്ലാതെയാണ് ആ ബന്ധം കൊണ്ടുപോയത്. അയാള് എന്നെ ചതിക്കാന് പോയ സാഹചര്യത്തിലാണ് അങ്ങനെയൊരു പോസ്റ്റ് ചെയ്തത്. ഇപ്പോള് ഞാന് ഈ ബന്ധത്തില് നിന്നും വേര്പിരിഞ്ഞാല് അയാള് എന്നെ കൊല്ലുമെന്നും മുഖത്ത് ആസിഡ് ഒഴിക്കുമെന്നും ഭീഷണിപ്പെടുത്തുന്നു.”
“ലോകത്ത് ഏറ്റവും വെറുക്കുന്നതും അയാളെയാണ്. പൊലീസില് പരാതി കൊടുത്തു. ഇതുവരെ 4 ലക്ഷം രൂപ എനിക്ക് തരാനുണ്ട്. മാനസികമായി അടുപ്പമില്ലെങ്കില് പോലും ഞങ്ങള് ഒരുമിച്ചാണ് താമസിക്കുന്നത്. കോളജില് എന്നെ കൊണ്ടാക്കാന് അവിടെ വരുമായിരുന്നു. അവിടെ വന്നാല് പോലും ഞാന് എവിടെപ്പോകുവാണെന്ന് തിരഞ്ഞു നടക്കും. കഴിഞ്ഞ ഒന്നരവര്ഷമായി അയാള് ഒരു ജോലിക്കു പോലും പോകുന്നില്ല. എനിക്ക് ചോദിക്കാനും പറയാനും ആരുമില്ല എന്ന ധൈര്യമാണ് അയാള്ക്ക്. സത്യത്തില് ആത്മഹത്യയുടെ വക്കിലാണ് ഞാന്. ജീവിതം മതിയായി. വേറൊരു നിവൃത്തി ഇല്ലാത്തതു കൊണ്ടാണ് ഇങ്ങനെയൊരു ലൈവില് വന്നത്.”അഞ്ജലി അമീര് വീഡിയോയില് പറഞ്ഞു. കോഴിക്കോട് സ്വദേശിയായ യുവാവിനെതിരെയാണ് അഞ്ജലി അമീറിന്റെ ആരോപണം.