തന്റെ ആരോഗ്യപ്രശ്നങ്ങളെ കുറിച്ച് പറഞ്ഞ് നടി മനീഷ. കഷ്ടകാലത്ത് കൂടെ നിന്നവരോട് നന്ദി പറഞ്ഞു കൊണ്ടുള്ള നടിയുടെ കുറിപ്പ് ചര്ച്ചയാവുകയാണ്. ജോലിയില്ലാതെ തുടരെ തുടരെ ആശുപത്രിയില് ആയപ്പോള് കാശ് കടം വാങ്ങിയവര് ചീത്ത വിളിക്കാന് തുടങ്ങി. അത് മനസിനെ ഉലച്ചു. പണിയെടുത്ത കാശ് പോലും കിട്ടാതിരുന്നതോടെ പാനിക് അറ്റാക്ക് വരെ ഉണ്ടായി എന്നാണ് മനീഷ കുറിപ്പില് പറയുന്നത്.
മനീഷയുടെ കുറിപ്പ്:
ജീവിതം വിസ്മയങ്ങള് നിറഞ്ഞ ഒരു തിരക്കഥ പോലെയാണ്… കുറച്ചേറെ മാസങ്ങളായി പലവക കാരണങ്ങളാലും ദുഃഖിതമായ ഒരന്തരീക്ഷത്തിലൂടെയാണ് ജീവിതം മുന്നോട്ടു നീങ്ങികൊണ്ടിരിക്കുന്നത്. മാനസികവ്യഥകളുടെ കാഠിന്യമേറിയപ്പോള് ശരീരം അതിന്റെ സ്വതസിദ്ധമായ പ്രതികരണങ്ങള് കാട്ടിതുടങ്ങിയതോടെ ആശുപത്രിവാസങ്ങളും തുടരെതുടരെയായി. കാശ് കടം വാങ്ങിയവരുടെ ചീത്തവിളികള് മനസിനെ തെല്ലൊന്നുമല്ല ഉലച്ചത്… നീണ്ട പത്തുപതിനഞ്ച് മാസങ്ങള്ക്കുമേറെ സ്ഥിരവരുമാനമില്ലാത്തതിന്റെ…
വരുമാനമില്ലായ്മ ചിലവിനെ ഒരുതരത്തിലും ബാധിക്കാത്തതും പണിയെടുത്തതിന്റെ കാശു വായിട്ടലച്ചിട്ടും കിട്ടാത്തതിന്റെയെല്ലാം വൈക്ലബ്യം ഒരു പാനിക് അറ്റാക്കിലേയ്ക്കും മറ്റുപല ശാരീരിക ക്ലേശങ്ങളിലേയ്കും വഴിതെളിച്ചപ്പോള് കൂടെ ആരൊക്കെയുണ്ട് ആത്മാര്ത്ഥതയോടെ എന്ന് തിരിച്ചറിയാനുള്ള ഒരു സുവര്ണ്ണ അവസരം കൂടിയായി അത്. പലരും വിളിച്ചാല് ഫോണ് പോലും എടുക്കാതെയായി… ജീവിതത്തിലെ ആ ഒരദ്ധ്യായത്തെ കുറിച്ച് വളരെ വിശദമായി ചിലരെയെല്ലാം പരാമര്ശിച്ചുകൊണ്ടുതന്നെ മറ്റൊരു കുറിപ്പ് ഞാനടുത്തു തന്നെ എഴുതും…
ഇപ്പൊ ഞാനീ പോസ്റ്റ് ഇടുന്നത് ഒരു സെല്ഫ് മോട്ടിവേഷനു വേണ്ടിയാണ്… ആലോചിച്ചാല് ഒരന്തവുമില്ല ആലോചിച്ചില്ലെങ്കില് ഒരു കുന്തവുമില്ലെന്ന് കുഞ്ഞുണ്ണി മാഷ് പറഞ്ഞപോലെ ജീവിതം അതിന്റെ താളക്രമത്തില് തന്നയേ മുന്നോട്ടുപോകൂ… കയറ്റിറക്കങ്ങള് എല്ലാ മനുഷ്യജന്മങ്ങള്ക്കും ബാധകം തന്നെ… കഷ്ടകാലത്തും കൂടെ നിന്ന ചുരുക്കം ചിലരോട് ഹൃദയത്തിന്റെ ഉള്ളില് നിന്നുള്ള സ്നേഹവും കടപ്പാടും. ഏതു കഷ്ടകാലത്തും പുഞ്ചിരിച്ചു നില്ക്കാനുള്ള കഴിവു തന്ന ദൈവത്തിനു നൂറുനൂറു നന്ദി.