‘പൂക്കാലം’ എന്ന സിനിമയ്ക്കായി നൂറ് വയസുള്ള അപ്പൂപ്പനായുള്ള നടന് വിജയരാഘവന്റെ മേക്കോവര് സോഷ്യല് മീഡിയയില് ശ്രദ്ധ നേടിയിരുന്നു. ഈ കഥാപാത്രത്തിനായി പത്ത് കിലോ ഭാരം കുറച്ചു എന്നാണ് വിജയരാഘവന് ഇപ്പോള് തുറന്നു പറഞ്ഞിരിക്കുന്നത്. ഒപ്പം അപ്പൂപ്പനാകാന് വേണ്ടി ചെയ്ത മേക്കപ്പുകളെ കുറിച്ചും താരം പറയുന്നുണ്ട്.
പ്രോസ്തറ്റിക് മേക്കപ്പായിരുന്നു ആദ്യം ചെയ്യാനിരുന്നത്. എന്നാല് തന്റെ കണ്ണിന്റെ ഭാഗങ്ങളും വായ് ഭാഗവുമെല്ലാം പൂര്ണമായി കൊട്ടിയടച്ചു കൊണ്ടുള്ള രൂപമാറ്റത്തിന് ഒരുക്കമായിരുന്നില്ല. തിരക്കഥ കേട്ടപ്പോള് തന്നെ കഥാപാത്രത്തിന്റെ ഏതാണ്ടൊരു രൂപം മനസ്സിലുണ്ടായിരുന്നു.
റോണക്സ് സേവ്യറിനൊപ്പം ചേര്ന്നാണ് പൂക്കാലത്തിലെ അപ്പൂപ്പന്റെ രൂപം ചിട്ടപ്പെടുത്തിയത്. കഥാപാത്രത്തിനായി ശരീരഭാരം പത്ത് കിലോ കുറച്ചു. അരി, ഗോതമ്പ് ഉള്പ്പെടെയുള്ള ധാന്യങ്ങള്, കിഴങ്ങുവര്ഗങ്ങള്, മധുരം എല്ലാം ഒഴിവാക്കിയുള്ള നീക്കമായിരുന്നു അത്.
മുടി വടിച്ചും പുരികം വെട്ടിക്കളഞ്ഞും, കൈകാലുകളിലെ നഖം നീട്ടിയും കഥാപാത്രത്തിനായി തയ്യാറെടുത്തു. പ്രായം ചെന്നവരുടെ ശരീരത്തില് കാണുന്ന ചുളിവുകള്, കലകള് എന്നിവയെല്ലാം ശ്രദ്ധിച്ചുള്ള ഡീറ്റെയ്ലിംഗിലൂടെയാണ് മേക്കപ്പ് ചെയ്തത്.
അപ്പൂപ്പന്റെ വേഷത്തിലേക്ക് മാറാന് മൂന്നാല് മണിക്കൂര് മേക്കപ്പ്മാന് മുന്നിലിരുന്നു എന്നാണ് വിജയരാഘവന് മാതൃഭൂമിക്ക് നല്കിയ അഭിമുഖത്തില് പറയുന്നത്. അതേസമയം, ഏപ്രില് 8ന് ആണ് പൂക്കാലം സിനിമ റിലീസ് ചെയ്യുന്നത്. ബേസില് ജോസഫ്, വിനീത് ശ്രീനിവാസന്, സുഹാസിനി, ജഗദീഷ്, അബു സലിം, ജോണി ആന്റണി, അന്നു ആന്റണി, റോഷന് മാത്യു എന്നിവരും പ്രധാന വേഷങ്ങളിലെത്തും.