കേരളത്തെ മുഴുവന് സങ്കടത്തിലാഴ്ത്തിയ സംഭവമാണ് ആലുവയില് അഞ്ചു വയസുകാരിയെ ക്രൂരമായി കൊലപ്പെടുത്തിയത്. സംഭവത്തില് പൊലീസിനെ വിമര്ശിച്ചു കൊണ്ട് സോഷ്യല് മീഡിയയില് രോക്ഷം ഉയരുന്നുണ്ട്. ഒപ്പം പ്രതിയെ നാട്ടുകാര്ക്ക് വിട്ടുകൊടുക്കണമെന്ന ആവശ്യം ഉയരുന്നുണ്ട്.
നടന് സിദ്ദിഖ് പങ്കുവച്ചൊരു പോസ്റ്റ് ആണ് ഇപ്പോള് വൈറല് ആകുന്നത്. നാദിര്ഷ സംവിധാനം ചെയ്ത അമര് അക്ബര് അന്തോണി എന്ന ചിത്രത്തിലെ ക്ലൈമാക്സിനോട് അടുത്ത സീനാണ് സിദ്ദിഖ് പങ്കുവച്ചിരിക്കുന്നത്. ചിത്രത്തില് പൊലീസ് ഉദ്യോഗസ്ഥനായാണ് സിദ്ദിഖ് വേഷമിടുന്നത്.
”നമ്മള് കഷ്ടപ്പെട്ട് അറസ്റ്റ് ചെയ്ത് കോടതിയില് ഹാജരാക്കി ശിക്ഷിച്ച് ജയിലിലേക്ക് അയച്ചിട്ട് എന്തോ ചെയ്യാനാ. ദിവസവും ചിക്കനും മട്ടനും കൊടുത്ത് വീര്പ്പിക്കാനോ. കൊറേണ്ണം കിടപ്പുണ്ടല്ലോ അവിടെ. ഒറ്റകയ്യനും കൈ ഇല്ലാത്തവനുമൊക്കെയായിട്ട്.”
”ഇത്തിരി പോന്ന കുഞ്ഞുങ്ങളോട് ഇങ്ങനെ ചെയ്യുന്നവന്മാരെ ശിക്ഷിക്കേണ്ടത് നമ്മളല്ലടോ ജനങ്ങളാ” എന്ന സംഭാഷണമുള്ള സീനാണ് സിദ്ദിഖ് പങ്കുവച്ചിരിക്കുന്നത്. അതേസമയം, ക്രൂര പീഡനത്തിന് ഇരയായി കൊല്ലപ്പെട്ട അഞ്ചു വയസുകാരിയുടെ മൃതദേഹം ഇന്ന് സംസ്കരിക്കും.