ഭാര്യ എലിസബത്ത് ഇപ്പോള്‍ തന്റെ കൂടെയില്ലെന്ന് നടന്‍ ബാല. ഗായിക അമൃത സുരേഷുമായുള്ള വിവാഹമോചനത്തിന് പിന്നാലെയാണ് ഡോക്ടര്‍ എലിസബത്തിനെ ബാല ജീവിതസഖിയാക്കിയത്. ബാലയുടെ മിക്ക വീഡിയോകളിലും അഭിമുഖങ്ങളിലും സജീവസാന്നിധ്യമായ എലിസബത്തിനെ ഇപ്പോള്‍ കാണാറില്ല.
ഇത് ആരാധകര്‍ ചര്‍ച്ചയാക്കിയതോടെയാണ് എലിസബത്ത് കൂടെയില്ലെന്ന കാര്യം ഒരു അഭിമുഖത്തില്‍ നടന്‍ വ്യക്തമാക്കിയിരിക്കുന്നത്. ആരുമായും എലിസബത്തിനെ താരതമ്യം ചെയ്യരുതെന്ന് പറഞ്ഞാണ് ബാല സംസാരിച്ചത്. ”ഒരു അഭിമുഖത്തിലും എലിസബത്തിനെ കുറിച്ച് പറയാന്‍ ഞാന്‍ തയ്യാറായിട്ടില്ല.”
”ഒരേയൊരു വാക്ക് ഇപ്പോള്‍ പറയാം. എലിസബത്ത് തങ്കമാണ്, ശുദ്ധമായ ക്യാരക്ടറാണ്. ഇപ്പോള്‍ എന്റെ കൂടെയില്ല. ഞാനും അവളുടെ കൂടെയില്ല. എന്റെ വിധിയാണ് എല്ലാം. താന്‍ എലിസബത്തിനെ ഒരു കുറ്റവും പറയില്ല” എന്നാണ് ബാല പറഞ്ഞത്.
എന്നാല്‍ ഇരുവരും വിവാഹമോചിതരായോ എന്ന കാര്യത്തില്‍ വ്യക്തതയില്ല. നേരത്തെ ബാലയും എലിസബത്തും വിവാഹമോചിതരായി എന്ന വാര്‍ത്തകള്‍ പ്രചരിച്ചിരുന്നു. എലിസബത്ത് അവളുടെ വീട്ടിലാണ് എന്ന് ബാല പറഞ്ഞതോടെ ആയിരുന്നു വിവാഹമോചന വാര്‍ത്തകള്‍ വന്നത്.
എന്നാല്‍ തങ്ങള്‍ ഇപ്പോഴും ഒന്നിച്ചാണെന്ന് ബാല വ്യക്തമാക്കിയിരുന്നു. എലിസബത്തിനൊപ്പം വീഡിയോകളിലും ബാല ഒന്നിച്ചെത്തിയിരുന്നു. അതേസമയം, അമൃത സുരേഷിനെതിരെ ഗുരുതര ആരോപണങ്ങളാണ് അടുത്തിടെ ബാല ഉന്നയിച്ചത്. കാണാന്‍ പാടില്ലാത്ത കാഴ്ച കണ്ടത് കൊണ്ടാണ് വിവാഹമോചിതരായത് എന്നായിരുന്നു ബാല പറഞ്ഞത്.