മലയാളി അല്ലെങ്കിലും മലയാളി പ്രേക്ഷകർക്ക് പ്രിയപ്പെട്ട നടിയാണ് ഖുശ്ബു. മലയാളത്തിലെ നിരവധി താരങ്ങളുമായി സൗഹൃദം സൂക്ഷിക്കുന്ന ഖുശ്ബു നടൻ സുരേഷ് ഗോപിയുമായുള്ള സൗഹൃദത്തെ കുറിച്ച് പറഞ്ഞ വാക്കുകളാണ് ശ്രദ്ധ നേടുന്നത്. അമൃത ടിവിയിലെ പരിപാടിക്കിടെയാണ് ഖുശ്ബു ഇക്കാര്യങ്ങളെ കുറിച്ച് മനസ് തുറന്നത്.
യാദവം സിനിമ തൊട്ട് ഇപ്പോഴും നിലനിൽക്കുന്ന സൗഹൃദമാണ് സുരേഷ് ഗോപിയുമായി തനിക്കുള്ളതെന്ന് ഖുശ്ബു പറഞ്ഞു. വളരെ വ്യക്തിപരമായ ബന്ധമാണ് സുരേഷേട്ടനുമായുള്ളത്. ഇന്നും തിരുവനന്തപുരത്ത് വന്നിട്ട് വീട്ടിൽ ചെന്നില്ലെങ്കിൽ അദ്ദേഹം തന്നെ കൊല്ലും. താൻ തിരുവന്തപുരത്ത് വന്നാൽ അദ്ദേഹത്തിന്റെ വീട്ടിലാണ് താമസിക്കുകയെന്നും. കുടുംബവുമായും അടുത്ത സൗഹൃദമാണ് ഉള്ളത്.
വളരെ പെട്ടന്ന് ദേഷ്യം വരുന്ന ആളാണ് സുരേഷ് ഗോപി. അതുപോലെ തന്നെ ദേഷ്യം പോവുകയും ചെയ്യും. മാത്രമല്ല എന്ത് സംസാരിച്ചാലും ഹൃദയത്തിൽ നിന്നാണ് അദ്ദേഹം സംസാരിക്കുക. ചുമ്മാ നമ്മളെ സന്തോഷിപ്പിക്കാൻ സംസാരിക്കില്ല. അത് ആളുകളിൽ അപൂർവമായി കാണുന്ന ഗുണമാണെന്നും അവർ പറഞ്ഞു. തുറന്ന ഹൃദയം ഉള്ളയാളാണ് സുരേഷ് ഗോപി.
തന്റെ വെെകാരികത ഒളിച്ചു വെക്കാൻ അദ്ദേഹത്തിനറിയില്ല. വളരെ സത്യസന്ധനുമാണ്. ഇപ്പോൾ മാത്രമല്ല വളരെ നാളുകൾക്ക് മുമ്പേ അദ്ദേഹം ചാരിറ്റി പ്രവർത്തനങ്ങൾ നടത്തുന്നുണ്ട്. അതിനെ പറ്റി അദ്ദേഹം അധികം സംസാരിക്കാറില്ലെന്നും അവർ പറഞ്ഞു.
അനുഭൂതി എന്ന സിനിമയിൽ തനിക്കും സുരേഷേട്ടെനും ഒരു പ്രണയ ഗാന രംഗമുണ്ട്. അത് ചെയ്യുമ്പോൾ തനിക്ക് കുറച്ച് മടിയുണ്ടായിരുന്നു. പക്ഷെ സുരേഷ് തന്നെ വളരെ കംഫർട്ടബിൾ ആക്കിയാണ് അത് ചെയ്തതെന്നും ഖുശ്ബു പറഞ്ഞു. ജോഷി സംവിധാനം ചെയ്ത പാപ്പൻ ആണ് സുരേഷ് ഗോപിയുടെ ഏറ്റവും അവസാനം റിലീസ് ചെയ്ത സിനിമ. ഒരിടവേളയ്ക്ക് ശേഷമാണ് സുരേഷ് ഗോപി കേസന്വേഷണ ഉദ്യോഗസ്ഥനായി ബിഗ് സ്ക്രീനിലെത്തിയത്.