മുന് പ്രധാനമന്ത്രി അടല് ബിഹാരി വാജ്പെയ്യുടെ ബയോപിക് അണിയറയില് ഒരുങ്ങുകയാണ്. ഉല്ലേഖ് എന്പി രചിച്ച ‘ദി അണ് ടോള്ഡ് വാജ്പെയ്: പൊളിറ്റീഷ്യന് ആന്റ് പാരഡോക്സ്’ എന്ന പുസ്തകത്തെ ആസ്പദമാക്കി സംവിധായകരായ വിനോദ് ഭനുശാലിയും സന്ദീപ് സിങും ചേര്ന്നാണ് ‘അടല്’ എന്ന ചിത്രം ഒരുക്കുന്നത്.
ബോളിവുഡ് താരം പങ്കജ് ത്രിപാഠിയാണ് ചിത്രത്തില് വാജ്പെയ് ആയി വേഷമിടുന്നത്. വാജ്പെയുടെ രൂപസാദൃശ്യം ലഭിക്കാനായി താന് എടുത്ത പ്രയത്നങ്ങളെ കുറിച്ച് തുറന്നു പറഞ്ഞിരിക്കുകയാണ് പങ്കജ് ത്രിപാഠി ഇപ്പോള്. വാജ്പെയ് ആയി മാറാന് വേണ്ടി താന് സ്വയം പാകം ചെയ്ത കിച്ച്ടി മാത്രമേ കഴിക്കാറുള്ളു എന്നാണ് നടന് പറയുന്നത്.
ഫിലിം കമ്പാനിയന് നല്കിയ അഭിമുഖത്തിലാണ് പങ്കജ് ത്രിപാഠി സംസാരിച്ചത്. ”ഈ ചിത്രത്തില് ഞാന് ഏകദേശം 60 ദിവസത്തോളം അഭിനയിച്ചിട്ടുണ്ട്. ആ 60 ദിവസവും ഞാന് സ്വയം പാകം ചെയ്ത കിച്ച്ടി മാത്രമാണ് കഴിച്ചത്. മറ്റുള്ളവര് അത് എങ്ങനെ പാകം ചെയ്യുമെന്ന് അറിയില്ല.”
”ഞാന് അതില് എണ്ണയോ മസാലയോ ഇട്ടിട്ടില്ല. പരിപ്പും അരിയും നാടന് പച്ചക്കറികളും മാത്രമാണ് ഉപയോഗിച്ചത്. അഭിനേതാക്കള് ശരിയായ രീതിയില് ഭക്ഷണം കഴിക്കണം. ആ വികാരം ശരിയാക്കാന് തലച്ചോറും ശരീരവും തമ്മില് സമന്വയം പാലിക്കേണ്ടതുണ്ട് അതിനായി നാടന് ലഘുഭക്ഷണം കഴിക്കണം” എന്നാണ് പങ്കജ് ത്രിപാഠി പറയുന്നത്.
അതേസമയം, അടല് ബിഹാരി വാജ്പെയ്യുടെ ഇതുവരെയും പുറത്തുവരാത്ത കഥകളാകും ചിത്ര പറയുക. സാഹിത്യ ജീവിതവും സിനിമയില് അടയാളപ്പെടുത്തും. ഡിസംബര് 25ന് ആണ് ചിത്രം റിലീസിന് ഒരുങ്ങുന്നത്. ഭാനുശാലി സ്റ്റുഡിയോസാണ് ചിത്രം നിര്മ്മിക്കുന്നത്.