മോഷണശ്രമത്തിനിടെ സെയ്ഫ് അലി ഖാന് കുത്തേറ്റ സംഭവത്തില് പ്രതികരിച്ച് നടന്റെ ഭാര്യയും നടിയുമായ കരീന കപൂര്. എല്ലാവരും തങ്ങളുടെ സ്വകാര്യതയെ മാനിക്കണം എന്നാണ് കരീന ഇന്സ്റ്റഗ്രാമില് പങ്കുവച്ച പോസ്റ്റില് പറയുന്നത്. മാധ്യമങ്ങളും പാപ്പരാസികളും നിരന്തരമായ ഊഹാപോഹങ്ങളില് നിന്നും കവറേജുകളില് നിന്നും വിട്ടുനില്ക്കണം എന്നാണ് കരീനയുടെ അഭ്യര്ത്ഥന.
”ഞങ്ങളുടെ കുടുംബത്തിന് അവിശ്വസനീയമാംവിധം അപകടം നിറഞ്ഞ ദിവസമായിരുന്നു ഇത്. സംഭവിച്ചത് എന്താണെന്ന് മനസിലാക്കിയെടുക്കാന് ശ്രമിച്ചു കൊണ്ടിരിക്കുകയാണ് ഞങ്ങളിപ്പോഴും. ഈ പ്രയാസകരമായ സമയത്ത് ഞങ്ങള്ക്കൊപ്പം നില്ക്കണം. മാധ്യമങ്ങളും പാപ്പരാസികളും നിരന്തരമായ ഊഹാപോഹങ്ങളില് നിന്നും കവറേജുകളില് നിന്നും വിട്ടുനില്ക്കണമെന്ന് ഞാന് ബഹുമാനത്തോടെയും വിനയത്തോടെയും അഭ്യര്ഥിക്കുന്നു.”
”നിങ്ങളുടെ ആശങ്കകളും പിന്തുണയും ഞങ്ങള് വിലമതിക്കുന്നു. എങ്കിലും നിരന്തരമായ നിങ്ങളുടെ പരിശോധനയും ശ്രദ്ധയുമൊക്കെ ഞങ്ങളുടെ സുരക്ഷയ്ക്ക് കാര്യമായ അപകടസാധ്യതയുണ്ടാക്കും. ഞങ്ങളുടെ സ്വകാര്യതയെ മാനിക്കണമെന്നും ഞങ്ങള്ക്ക് ഞങ്ങളുടേതായ ഇടം നല്കണമെന്നും താഴ്മയായി അഭ്യര്ഥിക്കുന്നു. ഇത്രയും നിര്ണായകമായ സാഹചര്യത്തില് നിങ്ങള് ഞങ്ങളെ മനസിലാക്കിയതിനും സഹകരിച്ചതിനും നന്ദി” എന്നാണ് കരീന കുറിപ്പില് പറയുന്നത്.
അതേസമയം, വ്യാഴാഴ്ച പുലര്ച്ചെ 2.30 ഓടെയാണ് മുംബൈയിലെ ബാന്ദ്രയിലെ ഹൈറൈസ് അപ്പാര്ട്ട്മെന്റില് അതിക്രമിച്ച് കയറിയ ആള് സെയ്ഫ് അലിഖാനെ മാരകമായി കുത്തി പരിക്കേല്പ്പിച്ചത്. കുട്ടികളുടെ മുറിയില് വച്ചായിരുന്നു ആക്രമണമെന്നും മോഷ്ടാവ് അകത്തു കയറിയെന്നറിഞ്ഞതിന് പിന്നാലെ കുട്ടികളുടെ സുരക്ഷ ഉറപ്പാക്കാനാണ് അദ്ദേഹം അവിടെ എത്തിയതെന്നുമാണ് നിഗമനം.