ഷാരൂഖ് ഖാന് എന്ന അള്ട്ടിമേറ്റ് സ്വാഗ് താരത്തെ അതിന്റെ ഫുള് പൊട്ടന്ഷ്യലില് കാണാന് ആഗ്രഹിച്ചവര്ക്ക് ഒരു ഗംഭീര വിരുന്ന് തന്നെയായിരുന്നു ‘പഠാന്’. റിലീസ് ചെയ്ത് 21 ദിവസങ്ങള് ആകുമ്പോള് തന്നെ 960 കോടി രൂപ കളക്ഷന് ആണ് ചിത്രം നേടിയിരിക്കുന്നത്. നാല് വര്ഷത്തെ ഇടവേളയ്ക്ക് ശേഷം വീണ്ടും തിയേറ്ററില് എത്തിയ ഷാരൂഖ് ചിത്രം ബോളിവുഡിനെ കൈപിടിച്ച് ഉയര്ത്തിരിക്കുകയാണ്. പഠാന്റെ വിജയാഘോഷത്തിന്റെ ഭാഗമായി തന്റെ മുംബൈയിലെ വസതിയായ മന്നത്തിന്റെ ബാല്ക്കണിയില് നിന്നും ആരാധകരെ കൈവീശി കാണിക്കുന്ന ചിത്രങ്ങള് വൈറലായിരുന്നു.
കോടികള് ബോക്സോഫീസില് എത്തിക്കുന്ന ഷാരൂഖ് ഖാന് മാജിക് അദ്ദേഹത്തിന്റെ ആഡംബര വസതികളിലും കാണാനാവും. മന്നത്ത് മുതല് ദുബായിലുള്ള ജന്നത്ത് വരെ കോടികള് വിലയുള്ള ആഡംബര വസതികള് ഷാരൂഖിനുണ്ട്. അതില് ഏറ്റവും പ്രസിദ്ധം മുംബൈയിലെ മന്നത്ത് തന്നെയാണ്. മുംബൈയിലെ ബാന്ദ്രയിലാണ് ഈ വീട്. കടലിന് അഭിമുഖമായി ഇരിക്കുന്ന ഈ ബംഗ്ലാവില് 5 ബെഡ്റൂമുകളും, ലൈബ്രറി, ജിം, പൂള്, സിനിമാ തിയേറ്റര് തുടങ്ങി എല്ലാ സൗകര്യങ്ങളുമുുണ്ട്. ഷാരൂഖിന്റെ ഭാര്യ ഗൗരി ഖാന്റെ ഡിസൈനില് പരമ്പരാഗതവും ആധുനികവുമായ ഡിസൈനുകള് ഒത്തു ചേര്ത്താണ് ഈ വീട് ഡിസൈന് ചെയ്തത്.
ഷാരൂഖ് ഖാന്റെ ദുബായിലെ വസതിയുടെ പേര് ജന്നത്ത് എന്നാണ്. 100 കോടി രൂപയോളമാണ് ഈ വസതിയുടെ വില. റിമോട്ട് കണ്ട്രോള് ഗാരേജുകളും സ്വകാര്യ പൂളുകളും ആഴക്കടലില് ഫിഷിംഗിനായുള്ള സൗകര്യവുമൊക്കെ ഇവിടെ ഒരുക്കിയിട്ടുണ്ട്.
ഷാരൂഖ് ഖാനും ഭാര്യ ഗൗരി ഖാനും ചേര്ന്ന് വാങ്ങിയ ഡല്ഹിയിലെ ഹോളിഡേ റിസോര്ട്ട് ഇരുവരുടെയും ഹൃദയത്തോട് ചേര്ന്ന് നില്ക്കുന്നതാണ്. ഇരുവരും കുട്ടിക്കാലം ചെലവഴിച്ചതും കണ്ടുമുട്ടിയതും പ്രണയത്തില് ആയതുമൊക്കെ ഈ നഗരത്തില് വച്ചാണ്. ഷാരൂഖിന്റെയും ഗൗരിയുടെയും ജീവിതത്തിലെ പ്രധാന സംഭവങ്ങള് എല്ലാം ഇവിടെ മനോഹരമായി ഫ്രെയിം ചെയ്ത് സൂക്ഷിച്ചിട്ടുണ്ട്.
മുംബൈയില് മറ്റൊരു ഹോളിഡേ ഹോം കൂടി ഷാരൂഖിനുണ്ട്. അലിബാഗിലുള്ള വസതി 15 കോടി രൂപ വിലമതിക്കുന്നതാണ്. ഔട്ട്ഡോര് സ്പെയ്സും പൂളും പ്രൈവറ്റ് ഹെലിപ്പാടും ഈ വസതിയിലുണ്ട്.
ലണ്ടനിലെ പാര്ക്ക് ലെയ്നിലുള്ള ഷാരൂഖ് ഖാന്റെ വസതി 183 കോടി രൂപയോളം വിലമതിക്കുന്നതാണ്. അദ്ദേഹത്തിന്റെ ഏറ്റവും വലിയ സ്വത്തുകളില് ഒന്നാണ് ഈ വസതി എന്നാണ് വിശ്വസിക്കപ്പെടുന്നത്. വെക്കേഷന് ആസ്വദിക്കാനായി ഷാരൂഖും കുടുബവും ലണ്ടനില് എത്താറുണ്ട്.