പൗരത്വ ഭേദഗതി നിയമവുമായി ബന്ധപ്പെട്ട് തന്നെ രൂക്ഷമായി വിമര്ശിച്ച നടന് നസ്റുദ്ദീന് ഷാക്ക് മറുപടി നല്കി നടന് അനുപം ഖേര്. പൗരത്വ ഭേദഗതി നിയമത്തെ അനുകൂലിച്ച് ട്വീറ്റ് ചെയ്തതിനാലാണ് കോമാളിയെന്നും പാദസേവകനെന്നും പറഞ്ഞ് നസ്റുദ്ദീന് ഷാ അനുപമിനെ വിമര്ശിച്ചത്.
ട്വിറ്ററില് പോസ്റ്റ് ചെയ്ത വീഡിയോയിലാണ് അനുപം ഖേറിന്റെ മറുപടി. നസ്റുദ്ദീന് ഷായുടെ പ്രസ്താവനകളെ ആരും ഗൗരവമായി എടുക്കാറില്ലെന്ന് അനുപം ഖേര് അഭിപ്രായപ്പെട്ടു. “”എന്നെക്കുറിച്ച് നിങ്ങള് നല്കിയ അഭിമുഖം ഞാന് കണ്ടു. ഞാന് കോമാളിയാണെന്നും നിങ്ങള് എന്നെ ഗൗരവമായി കാണുന്നില്ലെന്നും ഞാന് ഒരു പാദസേവകനാണെന്നും അതെല്ലാം എന്റെ രക്തത്തിലുള്ളതാണെന്നും നിങ്ങള് പറഞ്ഞു. ഈ അഭിനന്ദനങ്ങള്ക്ക് നന്ദി, പക്ഷേ നിങ്ങള് പറഞ്ഞത് ഞാന് ഗൗരവമായി എടുക്കുന്നില്ല. എന്നിരുന്നാലും, ഞാന് ഒരിക്കലും നിങ്ങളോട് മോശമായി സംസാരിക്കുകയോ പറയുകയോ ചെയ്യില്ല. എല്ലാ വിജയങ്ങളും ഉണ്ടായിരുന്നിട്ടും, നിങ്ങള് ജീവിതം മുഴുവന് നിരാശയോടെയാണ് ചിലവഴിച്ചതെന്ന് പറയാന് ഇപ്പോള് ഞാനാഗ്രഹിക്കുന്നു.””
“”ദിലീപ് കുമാര്, അമിതാഭ് ബച്ചന്, രാജേഷ് ഖന്ന, ഷാരൂഖ് ഖാന്, വിരാട് കോലി എന്നിവരെ നിങ്ങള് വിമര്ശിക്കുന്നുണ്ടെങ്കില്, ഞാന് ഒരു മികച്ച കൂട്ടായ്മയിലാണെന്ന് എനിക്ക് ഉറപ്പുണ്ട്. മാത്രമല്ല, ഈ ആളുകളാരും നിങ്ങളുടെ പ്രസ്താവനകളെ ഗൗരവമായി എടുത്തിട്ടില്ല. കാരണം ഇതൊന്നും നിങ്ങളല്ല സംസാരിക്കുന്നതെന്നും വര്ഷങ്ങളായി നിങ്ങള് സേവിക്കുന്ന വസ്തുക്കളാണെന്നും ഞങ്ങള്ക്കറിയാം. ശരിയും തെറ്റും നിര്ണയിക്കാനുള്ള നിങ്ങളുടെ കഴിവിനെ അവ മറച്ചിരിക്കുന്നു.””
“”എന്നെക്കുറിച്ച് മോശമായ കാര്യങ്ങള് പറയുന്നത് ഒന്നു രണ്ട് ദിവസത്തേക്ക് നിങ്ങളെ വാര്ത്തകളില് ഇടംനേടുമായിരിക്കും, ഇത് നിങ്ങള്ക്കുള്ള എന്റെ സമ്മാനമാണ്. ദൈവം നിങ്ങളെ സന്തോഷിപ്പിക്കട്ടെ, നിങ്ങളുടെ അഭ്യുദയകാംക്ഷിയായ അനുപം. എന്റെ രക്തത്തില് എന്താണുള്ളതെന്ന് നിങ്ങള്ക്കറിയാമോ, ഹിന്ദുസ്ഥാന്”” എന്ന് അനുപം ഖേര് പറഞ്ഞു.