ബോളിവുഡില് ഒരു കാലത്ത് ഏറ്റവും കൂടുതല് ഹിറ്റ് സിനിമകള് ഉണ്ടായിരുന്ന താരമാണ് അക്ഷയ് കുമാര്. എന്നാല് കോവിഡ് കാലത്തിന് ശേഷം താരത്തിന്റെതായി പുറത്തിറങ്ങിയ മിക്ക സിനിമകളും പരാജയങ്ങളാണ്. അടുത്തിടെ റിലീസ് ചെയ്ത ‘സര്ഫിര’ എന്ന സിനിമ പോലും തിയേറ്ററില് ഫ്ളോപ്പ് ആയി മാറിയിരുന്നു. എങ്കിലും വീണ്ടും പുതിയ സിനിമയുമായി എത്തുകയാണ് അക്ഷയ് കുമാര്.
‘ഖേല് ഖേല് മേം’ എന്ന ചിത്രമാണ് താരത്തിന്റെ ഏറ്റവും പുതിയ സിനിമ. ഈ ചിത്രത്തിന്റെ പ്രസ് മീറ്റിനിടെ താരം പറഞ്ഞ വാക്കുകള് ശ്രദ്ധ നേടുകയാണ് ഇപ്പോള്. താന് മരിച്ചിട്ടില്ല എന്നാണ് അക്ഷയ് പറയുന്നത്. ഇത് പറയുന്നതിന് പിന്നിലെ സാഹചര്യത്തെ കുറിച്ചും താരം വ്യക്തമാക്കിയിട്ടുണ്ട്.
സിനിമകള് പരാജയപ്പെട്ടതിന് പിന്നാലെ തനിക്ക് അനുശോചനങ്ങള് അറിയിച്ചു കൊണ്ടുള്ള മെസേജുകളാണ് ലഭിക്കുന്നത് എന്നാണ് അക്ഷയ് പറയുന്നത്. ”ഞാന് മരിച്ചിട്ടില്ല. എനിക്ക് ഇപ്പോള് അനുശോചന സന്ദേശങ്ങളാണ് ലഭിച്ചു കൊണ്ടിരിക്കുന്നത്. ഒരു മാധ്യമപ്രവര്ത്തകന് എഴുതിയത് ഞാന് കണ്ടു, ‘വിഷമിക്കേണ്ട നിങ്ങള് തിരിച്ചു വരും’ എന്ന്.”
”എന്തിനാണ് ഇങ്ങനെ എഴുതിയതെന്ന് അറിയില്ല. തിരിച്ചു വരാനായി ഞാന് എവിടെയും പോയിട്ടില്ല. ഞാന് ഇവിടെ തന്നെ ഉണ്ടല്ലോ. ജോലി ചെയ്യുന്നുണ്ട്, ചെയ്തു കൊണ്ടേയിരിക്കും. ആര് എന്ത് പറഞ്ഞാലും കുഴപ്പമില്ല. ഞാന് ജോലിക്ക് പോകും, തിരിച്ചു വരണം. എന്ത് സമ്പാദിച്ചാലും സ്വയം അദ്ധ്വാനിച്ചാണ് സമ്പാദിക്കുന്നത്.”
”ആരോടും ഞാന് ഒന്നും ചോദിക്കുന്നും ഇല്ല. ഷൂട്ടിംഗ് ഉള്ളിടത്തോളം കാലം ഞാന് ജോലിക്ക് പോകും” എന്നാണ് അക്ഷയ് കുമാര് പറയുന്നത്. അതേസമയം, സാമ്രാട്ട് പൃഥ്വിരാജ്, രക്ഷാബന്ധന്, രാം സേതു, സെല്ഫി, മിഷന് റാണിഗഞ്ച് തുടങ്ങി അക്ഷയ്യുടെ നിരവധി സിനിമകളാണ് അടുത്തിടെയായി ഫ്ളോപ്പ് ആയത്.