സോഷ്യൽമീഡിയ തുറന്നാൽ ഇപ്പോൾ തള്ള വൈബ്, തന്തവൈബ്, 90’s കിഡ്സ് വേഴ്‌സസ് ജെൻസി കിഡ്സ് ഇതൊക്കെയാണ്. എന്നാൽ 2025 മുതൽ ഇനി ഈ സീരീസിലേക്ക് പുതിയ ടീമുകൂടി എത്തിയിട്ടുണ്ട്. പേര് ജെൻ ബീറ്റ. കൺഫ്യൂഷൻ ആയോ……പറഞ്ഞു തരാം…..
2025 ജനുവരി 1 മുതൽ ലോകം പുതിയൊരു തലമുറയെ വരവേറ്റു. ‘ജെൻ ബീറ്റ’. എന്താണെന്നല്ലേ ജെൻ ആൽഫയുടെ പിൻഗാമികളായി 2025 മുതൽ പിറക്കുന്ന കുഞ്ഞുങ്ങളാണ് ജെനറേഷൻ ബീറ്റ ടീം എന്നറിയപ്പെടുന്നത്. അതായത് 2025 മുതൽ 2039 വരെ ജനിക്കുന്ന കുട്ടികളാണ് ജെൻ ബീറ്റയിൽ ഉൾപ്പെടുക. ‘ജനറേഷൻ ബീറ്റ’ എന്നറിയപ്പെടുന്ന ഈ പുത്തൻ തലമുറ Gen Z, മില്ലേനിയൽസ് എന്നിവയ്ക്ക് ശേഷം വന്ന Gen Alphaയുടെ പിൻഗാമിയാണ്. 90സ് കിഡ്സ് കേബിൾ ടിവിയും സിഡിയും, ജെൻസീ കിഡ്സ് ഇന്റർനെറ്റ് ടീമും ആയിരുന്നെങ്കിൽ ഈ ജെൻ ബീറ്റ ഇതുക്കും മേലയാണ്. വിർച്വൽ റിയാലിറ്റിയും ഇൻ്റർനെറ്റ് ഓഫ് തിങ്സും എഐ സാങ്കേതികവിദ്യയുമായിരിക്കും ബീറ്റ ജനറേഷൻ ലോകം.
ജെൻ ആൽഫ കാലത്തും ഇപ്പറഞ്ഞ സാങ്കേതികവിദ്യകളുണ്ടെങ്കിലും തൊഴിലിടം, വിദ്യാഭ്യാസം, ആരോഗ്യം, വിനോദം തുടങ്ങി സർവ മേഖലകളിലും എഐ, ഓട്ടോമേഷൻ സാങ്കേതികവിദ്യകൾ പൂർണമായി ഉപയോഗിക്കുന്ന ആദ്യ തലമുറ ജെൻ ബീറ്റ ആയിരിക്കും. ചുരുക്കത്തിൽ 22-ാം നൂറ്റാണ്ടിലേക്ക് ലോകത്തെ പരുവപ്പെടുത്തുന്നത് ഇപ്പറഞ്ഞ ജെൻ ബീറ്റ ആയിരിക്കുമെന്നാണ് കണക്കുകൂട്ടൽ. കാര്യങ്ങൾ ഇങ്ങനെയൊക്കെ ആണെങ്കിലും കാലാവസ്ഥാ വ്യതിയാനം, നഗരവൽക്കരണം, ആഗോളജനസംഖ്യ തുടങ്ങി വെല്ലുവിളികളും ജെൻ ബീറ്റയെ കാത്തിരിക്കുന്നുണ്ട്. അതുകൊണ്ട് തന്നെ ഇത്തരം പ്രശ്‌നങ്ങളെ ഫലപ്രദമായി നേരിടാൻ ജെൻ ബീറ്റയ്ക്ക് സാധിക്കുമെന്നാണ് പ്രതീക്ഷ.
സ്മാർട്ട് ടെക്‌നോളജിയുടെയും ആർട്ടിഫിഷ്യൽ ഇൻ്റലിജൻസിൻ്റെയും ഉയർച്ച ഇതിന് മുൻപുള്ള ആൽഫ ജനറേഷൻ അനുഭവിച്ചിട്ടുണ്ടെങ്കിലും എഐ ,ഓട്ടോമേഷൻ എന്നിവ ദൈനംദിന ജീവിതത്തിലും വിദ്യാഭ്യാസത്തിലും ജോലിസ്ഥലങ്ങളിലും ആരോഗ്യ സംരക്ഷണത്തിനും വിനോദത്തിനും പൂർണ്ണമായി ഉൾപ്പെടുത്തുന്ന ഒരു കാലഘട്ടം ജനറേഷൻ ബീറ്റ തന്നെയായിരിക്കും. ജനറേഷൻ ബീറ്റ ആരോഗ്യ സംരക്ഷണത്തിലും സാങ്കേതിക വിദ്യയിലും പുരോഗതി കൈവരിക്കുന്നതോടെ ഈ കാലയളവിൽ ജനിക്കുന്ന പല കുട്ടികൾക്കും കൂടുതൽ ആയുസ്സ് ഉണ്ടാകും.
സാമൂഹിക നീതി, പരിസ്ഥിതി സംരക്ഷണം തുടങ്ങിയ മേഖലകളിൽ വലിയ മാറ്റങ്ങൾക്ക് ഇവർ നേതൃത്വം നൽകുമെന്നാണ് പഠനങ്ങൾ. ജനറേഷൻ ബീറ്റയുടെ ഉദയം,മനുഷ്യരാശിയുടെ ഭാവിക്ക് വലിയ പ്രതീക്ഷകൾ നൽകുന്ന ഒന്നാണ്. കാലാവസ്ഥാ വ്യതിയാനം, ആഗോള ജനസംഖ്യാ വ്യതിയാനം, ദ്രുതഗതിയിലുള്ള നഗരവൽക്കരണം എന്നീ പ്രശ്നങ്ങൾ കാര്യമായി തന്നെ ജനറേഷൻ ബീറ്റ ജീവിതത്തിൽ നേരിടേണ്ടി വരും അതോടൊപ്പം 21-ാം നൂറ്റാണ്ടിലെ പാരിസ്ഥിതിക ആശങ്കകൾക്ക് പരിഹാരം കണ്ടെത്താനുള്ള ചുമതലയും ജനറേഷൻ ബീറ്റയുടേതാണ്. ഇനി ഈ പേരൊക്കെ കണ്ടുപിടിക്കുന്നത് എങ്ങനെയാണെന്ന് കൂടി പറയാം. മനുഷ്യ ചരിത്രത്തിലെ പുതിയ യുഗങ്ങളെ സൂചിപ്പിക്കാൻ ഗ്രീക്ക് അക്ഷരമാലയിൽ നിന്നാണ് ഈ പേരുകളെടുക്കുന്നത്. ജെൻ ആൽഫ മുതലാണ് ഈ രീതി ആരംഭിക്കുന്നത്. ആൽഫ ജനറേഷന് മുമ്പ് ജനറേഷൻ സീ ആയിരുന്നു. 1995 നും 2009 നും ഇടയിൽ ജനിച്ചവരാണ് ഇന്ന് ഏറെ പറഞ്ഞു കേൾക്കുന്ന ജെൻസികൾ. അതിന് മുമ്പ് 1980 നും 1994 നും ഇടയിൽ ജനിച്ചവരെ ജനറേഷൻ Y എന്നാണ് അറിയപ്പെടുന്നത്.
