പൂര്ണമായും സൗരോര്ജ്ജത്തില് പ്രവര്ത്തിക്കുന്ന ലോകത്തെ ആദ്യത്തെ വിമാനത്താവളമായ കൊച്ചി അന്താരാഷ്ട്ര വിമാനത്താവള ലിമിറ്റഡ് (സിയാല്), ഹരിതോര്ജ പദ്ധതികള് വിപുലീകരിക്കുന്നു. ലോകത്തില് ആദ്യമായി, ഒരു വിമാനത്താവളത്തില്, ഗ്രീന് ഹൈഡ്രജന് പ്ലാന്റ് സ്ഥാപിക്കുന്നതിനായി സിയാല് ഭാരത് പെട്രോളിയം കോര്പ്പറേഷന് ലിമിറ്റഡുമായി (ബി.പി.സി.എല്) ധാരണാപത്രം ഒപ്പുവച്ചു.
ബി. പി. സി. എല്ലിന്റെ സാങ്കേതിക പിന്തുണയോടെ, കൊച്ചി വിമാനത്താവള പരിസരത്താണ് ഗ്രീന് ഹൈഡ്രജന് പ്ലാന്റ് സ്ഥാപിക്കുന്നത്. പുനരുപയോഗയോഗ്യമായ സ്രോതസ്സുകളില് നിന്ന് ലഭിക്കുന്ന ഊര്ജമുപയോഗിച്ച് ഉല്പ്പാദിപ്പിക്കുന്നതാണ് ഗ്രീന് ഹൈഡ്രജന്. സിയാലിന്റെ സൗരോര്ജ പ്ലാന്റുകളില് നിന്നുള്ള വൈദ്യുതോര്ജം ഉപയോഗിച്ച് ഭാവിയുടെ ഇന്ധന’മായ ഗ്രീന് ഹൈഡ്രജനാണ് ബി.പി.സി.എല്ലിന്റെ സാങ്കേതിക സഹായത്തോടെ ഉത്പാദിപ്പിക്കുന്നത്. കാര്ബണ് വിമുക്ത (സീറോ കാര്ബണ്) സ്ഥാപനമായ സിയാലിന്റെ ഊര്ജോദ്പാദന സംരംഭങ്ങള്ക്ക് ഇത് കരുത്ത് പകരും.
തിരുവനന്തപുരം നിയമസഭാ മന്ദിരത്തില് നടന്ന ചടങ്ങില് മുഖ്യമന്ത്രി പിണറായി വിജയന്റെ സാന്നിധ്യത്തില് കരാര് കൈമാറി. കരാര് പ്രകാരം ബി.പി.സി.എല് പ്ലാന്റ് സ്ഥാപിക്കുകയും, വേണ്ട സാങ്കേതികസഹായം ലഭ്യമാക്കുകയും ചെയ്യും. വൈദ്യുതിയും വെള്ളവും മറ്റ് അടിസ്ഥാന സൗകര്യങ്ങളും സിയാല് ലഭ്യമാക്കും. 2025-ന്റെ തുടക്കത്തില് പൂര്ത്തിയാകുമെന്ന് പ്രതീക്ഷിക്കുന്ന പ്ലാന്റില് നിന്ന് ലഭിക്കുന്ന ഇന്ധനം വിമാനത്താവള ആവശ്യങ്ങള്ക്ക് ഉപയോഗിക്കുന്ന വാഹനങ്ങളില് ഉപയുക്തമാക്കും. ഇതിനായി പ്രത്യേക സജ്ജീകരണങ്ങളുള്ള വാഹനങ്ങള് വാങ്ങും.
ഈ പദ്ധതി സിയാലിന്റെ ഹരിതോര്ജ പ്രവര്ത്തനങ്ങള്ക്ക് മുതല്ക്കൂട്ടാകുമെന്ന് പ്രതീക്ഷിക്കുന്നു. 50 മെഗാവാട്ട് സ്ഥാപിതശേഷിയുള്ള സോളാര്- ഹൈഡ്രോ പദ്ധതികളിലൂടെ 2 ലക്ഷം യൂണിറ്റ് വൈദ്യുതി, സിയാല് ദിവസേന ഉല്പ്പാദിപ്പിക്കുന്നുണ്ട്. ഇതുകൂടാതെയാണ് 1000 കിലോവാട്ട് സ്ഥാപിതശേഷിയുള്ള ഗ്രീന് ഹൈഡ്രജന് പ്ലാന്റ് സിയാല് സ്ഥാപിക്കുന്നത്.
വ്യവസായ മന്ത്രി പി.രാജീവ്, ചീഫ് സെക്രട്ടറി ഡോ. വി. വേണു, അഡീഷണല് ചീഫ് സെക്രട്ടറി കെ.ആര്. ജ്യോതിലാല്, വ്യവസായ വകുപ്പ് പ്രിന്സിപ്പല് സെക്രട്ടറി സുമന് ബില്ല, സിയാല് മാനേജിംഗ് ഡയറക്ടര് എസ്. സുഹാസ്, ബി.പി.സി.എല് ചെയര്മാന് ജി. കൃഷ്ണകുമാര്, ബി.പി.സി.എല് ഡയറക്ടര്മാരായ വി.ആര്.കെ ഗുപ്ത, രഞ്ജന് നായര്, ബി.പി.സി.എല് എക്സിക്യൂട്ടീവ് ഡയറക്ടര് ഷെല്ലി എബ്രഹാം, സിയാല് എക്സിക്യൂട്ടീവ് ഡയറക്ടറും കമ്പനി സെക്രട്ടറിയുമായ സജി കെ. ജോര്ജ്, സിയാല് ജനറല് മാനേജര് (കൊമേഴ്സ്യല്) ജോസഫ് പീറ്റര് പൈനുങ്കല് എന്നിവരും ചടങ്ങില് പങ്കെടുത്തു.