അമിതവണ്ണത്തിന് പ്രധാന കാരണങ്ങളിലൊന്നാണ് വയറിനു ചുറ്റും അടിഞ്ഞു കൂടുന്ന കൊഴുപ്പ്. തടി കുറയ്ക്കാനായി പ്രയത്നിക്കുന്നവര് ആദ്യം ശ്രദ്ധിക്കേണ്ടതും ഇതുതന്നെയാണ്. ആരോഗ്യകരമായ ജീവിതശൈലി പിന്തുടരുന്നത് ഉള്പ്പെടുന്ന ശരിയായ വഴികള് ഉപയോഗിച്ച്, നിങ്ങള്ക്ക് ചുരുങ്ങിയ സമയത്തിനുള്ളില് ശരീരത്തിലെ അനാരോഗ്യകരമായ കൊഴുപ്പ് കുറയ്ക്കാന് കഴിയും. വയറിലെ കൊഴുപ്പ് വേഗത്തില് കത്തിക്കാനും സ്വാഭാവികമായും ശരീരഭാരം കുറയ്ക്കാനും സഹായിക്കുന്ന ചില പ്രകൃതിദത്ത പരിഹാരങ്ങള് കൂടിയുണ്ട്.
ശരീരത്തില് വിഷവസ്തുക്കള് അടിഞ്ഞുകൂടുന്നത് വയറിലെ അമിത കൊഴുപ്പിന് കാരണമാകുന്നു. ശരീരത്തില് നിന്ന് വിഷവസ്തുക്കളെയും മാലിന്യങ്ങളെയും ഉന്മൂലനം ചെയ്യുന്ന ഭക്ഷണപാനീയങ്ങള് കഴിക്കുന്നത് ശരീരഭാരം കുറയ്ക്കാന് സഹായിക്കും. ചില പാനീയങ്ങള് കുടിക്കുന്നതിലൂടെ നിങ്ങളുടെ വയറിലെ കൊഴുപ്പ് നീക്കാനാവുകയും അമിതവണ്ണത്തില് നിന്ന് മുക്തി നേടാന് സഹായിക്കുകയും ചെയ്യും. നിങ്ങളുടെ മെറ്റബോളിസം വര്ദ്ധിപ്പിക്കാനും വയറിലെ കൊഴുപ്പിനെതിരെ പോരാടാനും ശരീരഭാരം കുറയ്ക്കാനും സഹായിക്കുന്ന ചില പാനീയങ്ങള് ഇതാ.
തേന്- കറുവപ്പട്ട വെള്ളം
കറുവപ്പട്ട നിങ്ങളുടെ മെറ്റബോളിസം നിരക്ക് വര്ദ്ധിപ്പിക്കുന്നു, ഇത് ശരീരഭാരം കുറയ്ക്കുന്നതിനുള്ള പ്രക്രിയയെ വേഗത്തിലാക്കുന്നു. കൊഴുപ്പായി മാറുന്നതും ശരീരം ശരിയായി ഉപയോഗിച്ചില്ലെങ്കില് സാധാരണയായി വയറിന് ചുറ്റും അടിഞ്ഞുകൂടുന്നതുമായ പഞ്ചസാരയെ ഉപാപചയം ചെയ്യാനും ഇത് സഹായിക്കുന്നു.കറുവപ്പട്ട ആന്റി വൈറല്, ആന്റി ബാക്ടീരിയല്, ആന്റിഫംഗല് എന്നിവയാണെങ്കില് തേന് ആന്റിഓക്സിഡന്റുകളുടെ ശക്തികേന്ദ്രമാണ്. കറുവപ്പട്ട-തേന് പാനീയം ഇളംചൂടായി കഴിക്കാം. ഈ പാനീയം ഹൃദ്രോഗ സാധ്യത കുറയ്ക്കുകയും ചര്മ്മത്തിലെ അണുബാധകളെ ചികിത്സിക്കുകയും ചെയ്യും.ശരീരഭാരം കുറയ്ക്കുന്നതിനൊപ്പം വീക്കം കുറയ്ക്കുന്നു. ഏകദേശം 1 ടീസ്പൂണ് കറുവപ്പട്ട ചെറുചൂടുള്ള വെള്ളത്തില് തേനും ചേര്ത്ത് എല്ലാ ദിവസവും രാവിലെ കുടിക്കുക.
ആപ്പിള് സിഡെര് വിനെഗര്
ദിവസം മുഴുവന് നല്ല ദഹനത്തിനായി രാവിലെ നിങ്ങള്ക്ക് ആപ്പിള് സിഡെര് വിനെഗര് കഴിച്ച് ഒരു ദിവസം ആരംഭിക്കാവുന്നതാണ്. ആപ്പിള് സിഡെര് വിനെഗര് നിങ്ങളുടെ പിത്തരസത്തെ ഉത്തേജിപ്പിക്കുകയും ആമാശയത്തിലെ പി.എച്ച് അളവ് സന്തുലിതമാക്കുകയും ചെയ്യുന്നു. ഇത് നിങ്ങള്ക്ക് കൊഴുപ്പില്ലാത്ത പരന്ന വയര് നേടാന് സഹായിക്കും. ആപ്പിള് സിഡെര് വിനെഗര് കഴിക്കുന്നത് വയറ് നിറഞ്ഞ പ്രതീതി ഉളവാക്കുകയും വിശപ്പ് കുറയ്ക്കുകയും ചെയ്യും. എല്ലാ ദിവസവും രാവിലെ ഒരു ടീസ്പൂണ് ആപ്പിള് സിഡെര് വിനെഗര് ചെറുചൂടുള്ള വെള്ളത്തില് വെറും വയറ്റില് കഴിക്കുന്നത് തടി കുറയ്ക്കാന് ഗുണംചെയ്യും.
പൈനാപ്പിള് ജ്യൂസ്
പൈനാപ്പിള് ജ്യൂസ് വയറിലെ കൊഴുപ്പ് നീക്കാനുള്ള മികച്ച പാനീയമായി കണക്കാക്കപ്പെടുന്നു. പൈനാപ്പിള് ജ്യൂസില് കാണപ്പെടുന്ന ബ്രോമെലൈന് എന്ന പ്രധാന എന്സൈം പ്രോട്ടീന് മെറ്റബോളിസത്തിന് സഹായിക്കുകയും ശരീരത്തിലെ അമിത കൊഴുപ്പ് കത്തിക്കുകയും ചെയ്യുന്നു. തടി കുറയ്ക്കാന് ആഗ്രഹിക്കുന്നവര്ക്ക് ഉത്തമമായ ഒരു ജ്യൂസാണിത്.
പെപ്പര്മിന്റ് ടീ
നിങ്ങളുടെ ഭക്ഷണം വേഗത്തിലും ശരിയായി ദഹിപ്പിക്കാനും സഹായിക്കുന്ന പാനീയമാണ് പെപ്പര്മിന്റ് ചായ. നിങ്ങളുടെ ഭക്ഷണം ശരിയായി ആഗിരണം ചെയ്യപ്പെടാത്തതിനാല് അടിവയറ്റില് കൊഴുപ്പ് അടിഞ്ഞുകൂടാന് കാരണമാവുകയും ശരീരവണ്ണം വര്ധിക്കുകയും ചെയ്യുന്നു. പെപ്പര്മിന്റ് ചായ ശരീരത്തില് കൊഴുപ്പ് അടിഞ്ഞുകൂടുന്നത് തടയുന്നു. നിങ്ങളുടെ വയറിലെ കൊഴുപ്പ് നീക്കാന് ഇത് സഹായിക്കും.
നാരങ്ങ- ഇഞ്ചി പാനീയം
നാരങ്ങയുടെയും ഇഞ്ചിയുടെയും ഗുണങ്ങള് പറയാതെ വയ്യ. ഈ രണ്ടു സാധനങ്ങളും നമ്മുടെ അടുക്കളയില് നിന്നു തന്നെ കിട്ടും. നാരങ്ങ-ഇഞ്ചി ഡിറ്റോക്സ് പാനീയം തയ്യാറാക്കാന്, ഒരു ഗ്ലാസ് ചെറുചൂടുള്ള വെള്ളത്തില് അര നാരങ്ങ നീരും 2 ഇഞ്ച് നീളത്തുള്ള ഇഞ്ചിയും ചേര്ക്കുക. ഈ വെള്ളം സാധാരണ അളവില് പതിവായി ഉപയോഗിക്കുന്നത് ശരീരത്തില് നിന്ന് വിഷവസ്തുക്കളെ ഫലപ്രദമായി പുറന്തള്ളുമെന്ന് വിദഗ്ധര് അഭിപ്രായപ്പെടുന്നു. ഗവേഷണ പഠനങ്ങള് അനുസരിച്ച്, ഇഞ്ചി വിശപ്പ് കുറയ്ക്കും, നാരങ്ങ വിറ്റാമിന് സിയുടെയും ആന്റിഓക്സിഡന്റുകളുടെയും സമ്പന്നമായ ഉറവിടമാണ്. ഈ പാനീയം വലിയ അളവില് പ്രതിരോധശേഷിയും വര്ദ്ധിപ്പിക്കുന്നു.
കുക്കുമ്പര്- പുതിന പാനീയം
പോഷണം മാത്രമല്ല, അതിശയകരമായ രുചിയുമുള്ള മറ്റൊരു അത്ഭുത പാനീയമാണിത്. ജലസമൃദ്ധമായ കുക്കുമ്പറും പോഷക സമ്പുഷ്ടമായ പുതിനയും ഒരുമിച്ചു ചേര്ത്താല് ഒരിക്കലും തെറ്റില്ല. ഈ പാനീയം തയ്യാറാക്കാന്, ഒരു കുപ്പി വെള്ളത്തില് കുറച്ച് കഷ്ണം കുക്കുമ്പറും ചെറുതായി അരിഞ്ഞ പുതിനയിലയും ചേര്ക്കാം. ഈ ഡിടോക്സ് വെള്ളം ദിവസവും കഴിക്കാവുന്നതാണ്. വിദഗ്ദാഭിപ്രായപ്രകാരം, കുക്കുമ്പര്- പുതിന പാനീയം ശരീരഭാരം കുറയ്ക്കുന്നതിനൊപ്പം രക്തസമ്മര്ദ്ദം കുറയ്ക്കുക, ക്യാന്സര് തടയുക തുടങ്ങിയ എണ്ണമറ്റ പ്രതിരോധ പ്രവര്ത്തനങ്ങളും ചെയ്യുന്നു.ആന്റിഓക്സിഡന്റുകളുടെ സമ്പന്നമായ ഉറവിടം കൂടിയാണ് ഇവ.