ടോക്കിയോ ഒളിമ്പിക്സ് ടേബിള്‍ ടെന്നീസില്‍ ഇന്ത്യക്ക് നിരാശയോടെ തുടക്കം. മിക്സഡ് ഡബിള്‍സില്‍ ശരത് കമല്‍- മനിക ബത്ര സഖ്യം പുറത്തായി. പ്രീ-ക്വാര്‍ട്ടറില്‍ ചൈനീസ് തായ്പേയിയുടെ യുന്‍ ലിന്‍- ചിങ് ചെങ് സഖ്യത്തോടാണ് ഇന്ത്യന്‍ കൂട്ടുകെട്ട് കീഴടങ്ങിയത്. എതിരില്ലാത്ത നാല് ഗെയിമുകള്‍ക്കായിരുന്നു ചൈനീസ് തായ്പേയ് ടീമിന്റെ ജയം, സ്‌കോര്‍: 8-11, 6-11, 5-11, 4-11. ഇന്ത്യക്ക് മെഡല്‍ പ്രതീക്ഷയുണ്ടായിരുന്നു ഇനമായിരുന്നു ടേബിള്‍ ടെന്നീസ് മിക്സഡ് ഡബില്‍സ്.
ആദ്യ ഗെയിമിലൊഴിച്ച് ഇന്ത്യന്‍ ജോടിക്ക് തായ്പേയ് എതിരാളികള്‍ക്കെതിരെ പൊരുതി നില്‍ക്കാന്‍ സാധിച്ചില്ല. ലോക റാങ്കില്‍ ഒന്നാം സ്ഥാനത്തുള്ള യുന്‍ ലിന്നും ചിങ് ചെങ്ങും പെരുമയ്ക്കൊത്ത പ്രകടനം പുറത്തെടുത്തപ്പോള്‍ ഇന്ത്യന്‍ താരങ്ങള്‍ നിഷ്പ്രഭരായി. റാങ്കിങ്ങില്‍ 19-ാം സ്ഥാനത്തുള്ള ഇന്ത്യക്ക് തുടക്കത്തില്‍ തന്നെ കടുത്ത എതിരാളികളെ ലഭിച്ചെന്ന് പറയാം.
മനികയ്ക്ക് ഇന്ന് ഉച്ചയ്ക്ക് 12.15 സിംഗിള്‍സ് മത്സരമുണ്ട്. ബ്രിട്ടന്റെ ടിന്‍ ടിന്‍ ഹോയാണ് മനികയുടെ എതിരാളി. മറ്റൊരു വനിതാ താരം സുതിര്‍ത്ഥ മുഖര്‍ജി സ്വീഡന്റെ ലിന്‍ഡ ബെര്‍ഗ്സ്ട്രോമുമായി ഏറ്റുമുട്ടും. ആദ്യ റൗണ്ടില്‍ ബൈ കിട്ടിയ ജി. സത്യന് പ്യൂര്‍ട്ടോറിക്കയുടെ ബ്രയാന്‍ അഫാന്‍ഡര്‍ പ്രതിയോഗി. ശരത് കമലിനും ആദ്യ റൗണ്ടില്‍ ബൈ ലഭിച്ചിരുന്നു. പോര്‍ച്ചുഗലിന്റെ തിയാഗോ അപോലോണിയുമായി ശരത് അടുത്ത വട്ടത്തില്‍ കൊമ്പുകോര്‍ക്കും.