പാകിസ്ഥാന് ക്രിക്കറ്റ് താരം ഷൊയ്ബ് മാലിക്കുമായുള്ള വിവാഹബന്ധം വേര്പിരിഞ്ഞതിനു പിന്നാലെയുള്ള ടെന്നീസ് താരം സാനിയ മിര്സയുടെ ഇന്സ്റ്റഗ്രാം പോസ്റ്റ് ഏറ്റെടുത്ത് ആരാധകര്. പാക് നടി സന ജാവേദും മാലിക്കും തമ്മിലുള്ള വിവാഹം കഴിഞ്ഞദിവസം നടന്നിരുന്നു. പിന്നാലെയാണ് ഇരുവരും തമ്മില് നേരത്തെ തന്നെ വിവാഹ മോചനം നേടിയിരുന്നെന്ന വാര്ത്ത പുറത്തുവരുന്നത്.
റിഫ്ളക്ട് (Reflect) എന്ന തലക്കെട്ടോടെയാണ് തന്റെ ചിത്രം സാനിയ പോസ്റ്റ് ചെയ്തത്. സാനിയ ഇന്സ്റ്റഗ്രാമില് പങ്കുവെച്ച തന്റെ ചിത്രത്തിനൊപ്പമാണ് ഒറ്റ വാക്കിലുള്ള പ്രതികരണം നടത്തിയത്. പിന്നാലെ നിരവധി ആരാധകരാണ് സാനിയയ്ക്ക് പിന്തുണയുമായി രംഗത്തെത്തിയത്.
2010ല് ഹൈദരാബാദിലായിരുന്നു മാലിക്ക്-സാനിയ വിവാഹം. 2018-ല് ഇരുവര്ക്കും ഒരു മകന് ജനിച്ചു. തുടര്ന്ന് 2022-ലാണ് ഇരുവരും തമ്മില് അസ്വാരസ്യങ്ങളുണ്ടെന്നും വിവാഹമോചനത്തിന്റെ വക്കിലാണെന്നുമുള്ള അഭ്യൂഹങ്ങള് പരന്നത്. എന്നാല്, ഇക്കാര്യം ഇരുവരും നിഷേധിച്ചിരുന്നു. മകന് ഇസാന് ഇപ്പോള് സാനിയയ്ക്കൊപ്പമാണ് ഉള്ളത്.
മാലികിന്റെ മൂന്നാം വിവാഹമാണ് ഇത്. ആയിഷ സിദ്ദിഖിയായിരുന്നു മാലിക്കിന്റെ ആദ്യ ഭാര്യ. സാനിയയുമായുള്ളത് മാലികിന്റെ രണ്ടാം വിവാഹമായിരുന്നു. ഇരുവരും തമ്മില് വേര്പിരിയുകയാണെന്ന അഭ്യൂഹങ്ങള്ക്കിടെയാണ് മാലിക് മൂന്നാമതും വിവാഹിതനായത്.