പാകിസ്ഥാന്‍ ക്രിക്കറ്റ് താരം ഷൊയ്ബ് മാലിക്കുമായി മാസങ്ങള്‍ക്കു മുമ്പേ രണ്ടാം ഭാര്യ സാനിയ മിര്‍സ വിവാഹ മോചിതയായിരുന്നെന്ന് വെളിപ്പെടുത്തല്‍. മാലിക് മൂന്നാമതും വിവാഹിതനായതിനു പിന്നാലെയാണ് സാനിയയുടെ കുടുംബം ഇക്കാര്യം വെളിപ്പെടുത്തിയത്.
വ്യക്തിപരമായ വിവരങ്ങള്‍ സ്വകാര്യമാക്കി വയ്ക്കാന്‍ സാനിയ എല്ലായ്‌പ്പോഴും ശ്രദ്ധിച്ചിരുന്നു. എന്നാല്‍ ഇപ്പോള്‍ ചില കാര്യങ്ങള്‍ വ്യക്തമാക്കേണ്ട സാഹചര്യമുണ്ടായിരിക്കുന്നു. സാനിയയും ഷൊയ്ബും വിവാഹമോചിതരായിട്ട് കുറച്ചു മാസങ്ങളായി. പുതിയ യാത്രയില്‍ ഷൊയ്ബിനു സാനിയയുടെ ആശംസകള്‍- സാനിയയുടെ സഹോദരി അനം മിര്‍സ സോഷ്യല്‍ മീഡിയയില്‍ പങ്കുവെച്ച കുറിപ്പില്‍ പറഞ്ഞു.
2010ല്‍ ഹൈദരാബാദിലായിരുന്നു മാലിക്ക്-സാനിയ വിവാഹം. 2018-ല്‍ ഇരുവര്‍ക്കും ഒരു മകന്‍ ജനിച്ചു. തുടര്‍ന്ന് 2022-ലാണ് ഇരുവരും തമ്മില്‍ അസ്വാരസ്യങ്ങളുണ്ടെന്നും വിവാഹമോചനത്തിന്റെ വക്കിലാണെന്നുമുള്ള അഭ്യൂഹങ്ങള്‍ പരന്നത്. എന്നാല്‍, ഇക്കാര്യം ഇരുവരും നിഷേധിച്ചിരുന്നു. മകന്‍ ഇസാന്‍ ഇപ്പോള്‍ സാനിയയ്‌ക്കൊപ്പമാണ് ഉള്ളത്.
പാക് നടി സന ജാവേദിനെയാണ് മാലിക് മൂന്നാമതായി വിവാഹം ചെയ്തത്. ആയിഷ സിദ്ദിഖിയായിരുന്നു മാലിക്കിന്റെ ആദ്യ ഭാര്യ.
