ബോക്സിംഗ് രംഗത്തെ മികച്ച താരങ്ങളിലൊരാളായ ജര്മനിയുടെ മൂസ യമാക് (38) മത്സരത്തിനിടെ കുഴഞ്ഞുവീണ് മരിച്ചു. ഹൃദയാഘാതമാണ് മരണകാരണം.
മ്യൂണിക്കില് വെച്ച് നടന്ന മത്സരത്തില് യുഗാന്ഡയുടെ ഹംസ വാന്ഡേറയെ നേരിടുമ്പോളാണ് യമാക് ഹൃദയാഘാതത്തെത്തുടര്ന്ന് കുഴഞ്ഞുവീണത്. ഉടന്തന്നെ പ്രാഥമിക ശുശ്രൂഷകള് നല്കിയെങ്കിലും ജീവന് രക്ഷിക്കാനായില്ല.
പ്രഫഷണല് ബോക്സിംഗില് ഒരു ബോക്സര്ക്ക് പോലും മൂസ യമാകിനെ ഇതുവരെ തോല്പ്പിക്കാനായിട്ടില്ല. പങ്കെടുത്ത എട്ട് മത്സരങ്ങളിലും താരം വിജയം നേടി.
2021-ല് നടന്ന ഡബ്ല്യുബി ഫെഡ് അന്താരാഷ്ട്ര കിരീടം നേടിയതോടെയാണ് യമാക് ലോക പ്രശസ്തനായത്. തുര്ക്കിയില് ജനിച്ച യമാക് 2017ലാണ് പ്രഫഷണല് രംഗത്തേക്ക് വരുന്നത്. പിന്നീട് ജര്മനിയിലേക്ക് താമസം മാറുകയായിരുന്നു.