ഈ സീസണ് കഴിയുന്നതോടെ കേരള ബ്ലാസ്റ്റേഴ്സ് വിടുമെന്ന അഭ്യൂഹങ്ങളോട് പ്രതികരിച്ച് പരിശീലകന് ഇവാന് വുകോമനോവിച്ച്. എല്ലാം കിംവദന്തികള് മാത്രമാണെന്നും ബ്ലാസ്റ്റേഴ്സില് തുടരാനാണ് താന് ഇഷ്ടപ്പെടുന്നതെന്നും ഇവാന് ‘മനോരമ’യ്ക്ക് നല്കിയ അഭിമുഖത്തില് പറഞ്ഞു.
ഞാന് ഈ ക്ലബ്ബിനെ ഏറെ ഇഷ്ടപ്പെടുന്നു. ഇവിടെ തുടരാനും ഏറെ ഇഷ്ടം. കേരളത്തിന് എന്റെ ഹൃദയത്തിലാണ് ഇടം. അങ്ങനെയുള്ളപ്പോള് ഞാന് എന്തിന് ഈ ടീം വിടണം? ടീമിന്റെ പുരോഗതിയില് പ്രചോദിതനാണ് ഞാന്. വരുംനാളുകളില് നല്ല ഫലമുണ്ടാക്കുന്നതിനായി ചിലതു ചെയ്യുന്നതിന്റെ ആവേശത്തിലുമാണ്- ഇവാന് ‘മനോരമ’യോട് പറഞ്ഞു.
അതിനിടെ ടീമിന്റെ ക്യാപ്റ്റന് അഡ്രിയന് ലൂണ പരുക്ക് മാറി തിരിച്ചെത്തി. പരിശീലകന്റെയും വൈദ്യസംഘത്തിന്റെയും മേല്നോട്ടത്തില് ലൂണ പരിശീലനം പുനരാരംഭിച്ചു. പ്ലേഓഫിനു മുന്പേ താരം കളത്തില് തിരിച്ചെത്തുമെന്ന കണക്കുകൂട്ടലിലാണ് ബ്ലാസ്റ്റേഴ്സ്. ഈ മാസം 30നു ജംഷഡ്പുരിനെതിരെയാണ് ബ്ലാസ്റ്റേഴ്സിന്റെ അടുത്ത മത്സരം.
ഐസ്എലില് നാലു മത്സരം ബാക്കിയുള്ള ബ്ലാസ്റ്റേഴ്സ് അഞ്ചാം സ്ഥാനക്കാരായി പ്ലേഓഫ് ബര്ത്ത് ഏറക്കുറെ ഉറപ്പിച്ചിട്ടുണ്ട്. മാര്ച്ച് പതിമൂന്നിന് കൊച്ചി ജവഹര്ലാല് നെഹ്റു സ്റ്റേഡിയത്തില് നടന്ന പത്താം സീസണിലെ പതിനെട്ടാം മത്സരത്തില് കേരളാ ബ്ലാസ്റ്റേഴ്സ് മോഹന് ബഗാന് സൂപ്പര് ജൈന്റ്സിനോട് പരാജയപ്പെട്ടിരുന്നു. ഏഴു ഗോളുകള് പിറന്ന മത്സരത്തില് നാലു ഗോളുകള് നേടിയ മോഹന് ബഗാന് സൂപ്പര് ജൈന്റ്സ് ഒരു ഗോളിന്റെ ലീഡില് വിജയിച്ചു.