കേരള ബ്ലാസ്റ്റേഴ്സ് എഫ്സിയുടെ പുതിയ അസോസിയേറ്റ് സ്പോൺസറായി വിഐപി ക്ലോത്തിംഗ് ലിമിറ്റഡ്. ബിസിനസ് വിപുലീകരണവും രാജ്യത്തെ യുവാക്കളെ ശാക്തീകരിക്കുന്നതിന്റെയും ഭാഗമായി, അടുത്തിടെയാണ് ‘റിവോൾട്ട’ എന്ന പേരിൽ ഫാഷനും കംഫർട്ടും ഒരുമിച്ചുചേരുന്ന പുതിയ വസ്ത്രശേഖരം വിപണിയിൽ അവതരിപ്പിച്ചുകൊണ്ട് വിഐപി ക്ലോത്തിംഗ് ലിമിറ്റഡ് സജീവമായത്. കേരള ബ്ലാസ്റ്റേഴ്സ് എഫ്സിയുമായുള്ള പങ്കാളിത്തത്തിലൂടെ കൂടുതൽ യുവാക്കളിലേക്ക് എത്തിച്ചേരുന്നതിനോടൊപ്പം ഫുട്ബോളിനും സമൂഹത്തിനും നല്ലൊരു ഭാവി സൃഷ്ടിക്കുവാനുള്ള പ്രതിബദ്ധത ഉറപ്പാക്കുകയുമാണ് വിഐപി ക്ലോത്തിംഗ് ലിമിറ്റഡ്.
ഇന്ത്യയിലെ ജനങ്ങളിൽ ഐഎസ്എൽ ഒരു ആവേശം തന്നെയാണ് സൃഷ്ടിച്ചിരിക്കുന്നത്. ഓരോ മത്സരങ്ങളും ആവേശത്തോടെ കാണുവാൻ കാത്തിരിക്കുന്നത് നിരവധിപേരാണ്. കേരള ബ്ലാസ്റ്റേഴ്സിനെപ്പോലെ കരുത്തരായ ഒരു ടീമിനൊപ്പം ചേരുവാൻ സാധിച്ചതിൽ ഞങ്ങൾക്ക് അഭിമാനമുണ്ട്. പുതിയ സീസണിലെ വരാനിരിക്കുന്ന മത്സരങ്ങൾക്കായി ആരാധകരെപ്പോലെത്തന്നെ ഞങ്ങളും ആകാംക്ഷയോടെ കാത്തിരിക്കുകയാണ് – വിഐപി ക്ലോത്തിംഗ് ലിമിറ്റഡ് ഡയറക്ടർ എം. കപിൽ പതാരെ പറഞ്ഞു.
“അസോസിയേറ്റ് സ്പോൺസർ എന്ന നിലയിൽ വിഐപി ക്ലോത്തിംഗ് ലിമിറ്റഡുമായി ഞങ്ങളുടെ പങ്കാളിത്തം വിപുലീകരിക്കുന്നതിൽ ഏറെ സന്തോഷമുണ്ട്. യുവാക്കളിൽ ഊർജവും ആത്മവിശ്വാസവും നിറയ്ക്കുവാനുള്ള അവരുടെ പ്രതിബദ്ധത, നമ്മുടെ ടീമിന്റെയും സ്പോർട്സിന്റെയും കാഴ്ചപ്പാടുകളുമായി തീർത്തും യോജിക്കുന്നു. നമ്മുടെ ആരാധകർക്കായി അവിസ്മരണീയ അനുഭവങ്ങൾ സമ്മാനിക്കുവാനും ഒപ്പം ഇന്ത്യൻ ഫുട്ബോളിന്റെ വളർച്ചയെ പിന്തുണയ്ക്കുവാനും ഒരുമിച്ച് മുന്നോട്ടുപോകുന്നതിനായി പ്രതീക്ഷയോടെ കാത്തിരിക്കുന്നു”, കേരള ബ്ലാസ്റ്റേഴ്സ് എഫ്.സി സി.ഇ.ഒ അഭീക് ചാറ്റർജി പറഞ്ഞു.