ഐഎസ്എല് ഫുട്ബോളില് കേരള ബാസ്റ്റേഴ്സിന് ഇക്കുറിയും ജയമില്ല. മുന് ചാമ്പ്യന് ബംഗളൂരു എഫ്സിയുമായി ബാസ്റ്റേഴ്സ് 1-1ന് സന്ധി ചെയ്തു. ബംഗളൂരുവിന് വിജയ പ്രതീക്ഷ നല്കിയ ഗോള് കുറിച്ചത് മലയാളി താരം ആഷിഖ് കുരുണിയനാണ്. എന്നാല് ആഷിഖിന്റെ തന്നെ സെല്ഫ് ഗോള് ബാസ്റ്റേഴ്സിന് അനുഗ്രഹമായപ്പോള് ബംഗളൂരുവിന് സമനിലയുമായി കരകയറേണ്ടിവന്നു.
മത്സരത്തിന്റെ ഭൂരിഭാഗം സമയങ്ങളിലും പന്ത് കൈവശം വച്ച ബംഗളൂരു എഫ്സിക്ക് അര്ഹിച്ച ജയമാണ് നഷ്ടമായത്. ഒന്നാം പകുതി ഗോള് രഹിതമായിരുന്നു. രണ്ടാം പകുതിയിലും ഏറെ നേരം ഗോള് അകന്നു നിന്നു. എന്നാല് 84-ാം മിനിറ്റില് ഇടതു വിങ്ങില് നിന്ന് പന്ത് സ്വീകരിച്ച അഷീഖ് കുരുണിയന് തൊടുത്ത ലോങ് റേഞ്ച് ബ്ലാസ്റ്റേഴ്സ് ഗോളിയെ മറികടന്ന് ഗോള്വര താണ്ടിയപ്പോള് ബംഗളൂരു 1-0ന് മുന്നില്.
പക്ഷേ, ഹീറോയായി തലനിവര്ത്തി നിന്ന ആഷിഖ് അധികം വൈകാതെ ബംഗളൂരുവിന്റെ വില്ലനായി മാറുകയും ചെയ്തു. ബംഗളൂരു ഗോള് മുഖത്തു വന്ന ക്രോസ് ക്ലിയര് ചെയ്യാന് ശ്രമിച്ച ആഷിഖ് സെല്ഫ് ഗോള് അടിച്ചതോടെ ബാസ്റ്റേഴ്സിന് അപ്രതീക്ഷ സമനില കൈവന്നു (1-1).