ബ്രസീൽ ടീമിലേക്ക് വന്ന പുത്തൻ താരോദയമാണ് ഡിഫൻഡർ മുറില്ലോ. മികച്ച പ്രകടനമാണ് താരം നടത്തുന്നത്. 22 വയസ്സ് മാത്രമുള്ള ഈ താരം പ്രീമിയർ ലീഗ് ക്ലബ്ബായ നോട്ടിങ്ഹാം ഫോറസ്റ്റിന് വേണ്ടി തകർപ്പൻ ഫോമിലാണ് കളിക്കുന്നത്. ഇത്തവണത്തെ ഇന്റർനാഷണൽ ബ്രേക്കിൽ 2 വേൾഡ് കപ്പ് യോഗ്യത മത്സരങ്ങളാണ് ബ്രസീൽ കളിക്കുന്നത്. വെനിസ്വേലയും ഉറുഗ്വയുമാണ് അവരുടെ എതിരാളികൾ.
ബ്രസീൽ ടീമിൽ ഇടം നേടിയതിൽ സന്തോഷം പ്രകടിപ്പിച്ച് താരം ഇപ്പോൾ സംസാരിച്ചിരിക്കുകയാണ്. ടിവിയിലും വീഡിയോ ഗെയിമിലും മാത്രം കണ്ട താരങ്ങളോടൊപ്പമാണ് ഇനി താൻ കളിക്കളം പങ്കിടാൻ പോകുന്നത് എന്നും അതിൽ അഭിമാനമുണ്ടെന്നും അദ്ദേഹം പറഞ്ഞു.
മുറില്ലോ പറയുന്നത് ഇങ്ങനെ:
”ഞാൻ ദൈവത്തോട് നന്ദി പറയേണ്ടതുണ്ട്. എന്റെ സ്വപ്നം സാക്ഷാത്കരിക്കപ്പെട്ടതിൽ ഞാൻ വളരെയധികം സന്തോഷവാനാണ്. ഈ താരങ്ങളെ ഞാൻ ടിവിയിലും വീഡിയോ ഗെയിമിലും മാത്രമാണ് കണ്ടിട്ടുള്ളത്. ഇപ്പോൾ അവരോടൊപ്പം കളിക്കളം പങ്കിടുന്നു”
മുറില്ലോ തുടർന്നു:
“ഇതൊരു പ്രിവിലേജ് തന്നെയാണ്. ഞാൻ എന്റെ സ്വപ്നത്തിലാണ് ഇപ്പോൾ ജീവിച്ചുകൊണ്ടിരിക്കുന്നത്. ഇനിയും ഒരുപാട് അവസരങ്ങൾ ലഭിക്കുമെന്ന് ഞാൻ പ്രതീക്ഷിക്കുന്നു. ദേശീയ ടീമിന് വേണ്ടി എന്റെ ഡ്യൂട്ടി നിർവ്വഹിക്കാൻ എനിക്ക് കഴിയുമെന്ന് ഞാൻ പ്രതീക്ഷിക്കുന്നു ” മുറില്ലോ പറഞ്ഞു.