പണ്ട് മാഞ്ചസ്റ്റർ യുണൈറ്റഡ് എന്ന് കേൾക്കുമ്പോൾ എതിരാളികൾ ഭയപ്പെട്ടിരുന്നു. എന്നാൽ ഇപ്പോൾ അങ്ങനെയല്ല കാര്യങ്ങൾ. ഏത് ചെറിയ ടീമിന് വേണമെങ്കിലും വന്നു തോൽപ്പിച്ചിട്ട് പോകാം എന്ന അവസ്ഥയിലായി കാര്യങ്ങൾ. ഇംഗ്ലീഷ് പ്രീമിയർ ലീഗിലെ ഈ സീസണിൽ ഏറ്റവും മോശമായ ഒരു ടീം ഉണ്ടെങ്കിൽ അത് മാഞ്ചസ്റ്റർ യുണൈറ്റഡ് ആണ്. ഈ സീസണിൽ കേവലം നാലുമത്സരങ്ങളിൽ മാത്രമാണ് അവർക്ക് വിജയിക്കാൻ കഴിഞ്ഞിട്ടുള്ളത്. ഇതോടെ പരിശീലക സ്ഥാനത്ത് നിന്ന് എറിക്ക് ടെൻ ഹാഗിനെ പുറത്താക്കിയിരുന്നു. പകരം റൂബൻ അമോറിമിനെ അവർ മുഖ്യ പരിശീലകനായി കൊണ്ട് നിയമിച്ചിട്ടുണ്ട്.
ടെൻ ഹാഗിന്റെ പുറത്താകലിനെ കുറിച്ച് മാഞ്ചസ്റ്റർ യുണൈറ്റഡിന്റെ ബ്രൂണോ ഫെർണാണ്ടസ് സംസാരിച്ചിരിക്കുകയാണ്. അതായത് ടെൻഹാഗിനോട് താൻ സംസാരിച്ചിരുന്നു എന്നും അദ്ദേഹത്തോട് മാപ്പ് പറഞ്ഞു എന്നുമാണ് ബ്രൂണോ പറഞ്ഞിട്ടുള്ളത്. അദ്ദേഹത്തിന്റെ പുറത്താവലിന് താൻ കൂടി ഉത്തരവാദിയാണെന്നും ബ്രൂണോ കൂട്ടിച്ചേർത്തിട്ടുണ്ട്.
ബ്രൂണോ ഫെർണാണ്ടസ് പറയുന്നത് ഇങ്ങനെ:
” ഒരു പരിശീലകന് വിമർശനങ്ങൾ ഏൽക്കുന്നുണ്ടെങ്കിൽ അത് താരങ്ങൾക്ക് കൂടിയുള്ളതാണ്. കാരണം ടീം മികച്ച പ്രകടനം നടത്താത്തതിനാണ് അത് ലഭിക്കുന്നത്. 15 താരങ്ങളെ ഒഴിവാക്കുന്നതിനേക്കാൾ എളുപ്പമാണ് ഒരു പരിശീലകനെ ഒഴിവാക്കുന്നത്. ഞാൻ അദ്ദേഹവുമായി സംസാരിച്ചിരുന്നു. അദ്ദേഹത്തോട് മാപ്പ് പറയുകയും ചെയ്തിട്ടുണ്ട്. അദ്ദേഹം പുറത്തായതിൽ ഞാൻ നിരാശനാണ്”
ബ്രൂണോ ഫെർണാണ്ടസ് തുടർന്നു:
അദ്ദേഹത്തെ സഹായിക്കാൻ ഞാൻ ശ്രമിച്ചിരുന്നു. പക്ഷേ ഞങ്ങൾക്ക് ഗോളുകൾ ഒന്നും നേടാൻ കഴിഞ്ഞില്ല. അദ്ദേഹത്തിന്റെ പുറത്താവലിന് ഞങ്ങൾ ഉത്തരവാദികളാണ്. മാനേജർ പുറത്താവുക എന്നത് ഏത് ഒരു ടീമിനെ സംബന്ധിച്ചിടത്തോളം നല്ല കാര്യമല്ല. ടീമിന്റെ മോശം പ്രകടനത്തിന് വില നൽകേണ്ടിവന്നത് അദ്ദേഹം മാത്രമാണ് “ ബ്രൂണോ ഫെർണാണ്ടസ് പറഞ്ഞു.
