പി.എസ്.ജി സൂപ്പര് താരം കിലിയന് എംബാപ്പെക്ക് പരിക്ക്. താരത്തിന്റെ വലത് കാലിനാണ് പരിക്കേറ്റത്. ഇതോടെ ചാമ്പ്യന്സ് ലീഗില് ചൊവ്വാഴ്ച മാഞ്ചസ്റ്റര് സിറ്റിക്കെതിരെ നടക്കുന്ന രണ്ടാം പാദ സെമി ഫൈനലില് താരം കളിക്കുന്ന കാര്യം സംശയത്തിലായി.
സ്വന്തം ഗ്രൗണ്ടില് നടന്ന ആദ്യ പാദത്തില് 2-1ന് തോറ്റ പി.എസ്.ജിക്ക് മാഞ്ചസ്റ്റര് സിറ്റിയുടെ ഗ്രൗണ്ടില് നടക്കുന്ന രണ്ടാം പാദം വളരെ നിര്ണായകമാണ്. ഒന്നാം പകുതിയില് 1-0 മുന്നിട്ട് നിന്നതിന് ശേഷമാണ് രണ്ടാം പകുതിയില് 2 ഗോള് വഴങ്ങി പി.എസ്.ജി പരാജയപ്പെട്ടത്.
താരത്തിന്റെ പരിക്ക് എത്രത്തോളം ഗുരുതരമാണെന്ന് പി.എസ്.ജി വ്യക്തമാക്കിയിട്ടില്ല. എന്നാല് ലീഡ് ഒന്നില് ഇന്ന് നടക്കുന്ന ലെന്സിനെതിരായ മത്സരത്തില് താരം കളിക്കില്ലെന്ന് പി.എസ്.ജി അറിയിച്ചു.
ചാമ്പ്യന്സ് ലീഗില് ഇക്കുറി കളിച്ച 10 മത്സരങ്ങളില് 8 ഗോളുകളും 3 അസിസ്റ്റുകളുമാണ് എംബാപ്പെയുടെ സമ്പാദ്യം. എന്നാല് മാഞ്ചസ്റ്റര് സിറ്റിക്കെതിരായ മത്സരത്തില് മികച്ച പ്രകടനം പുറത്തെടുക്കാന് താരത്തിനായിരുന്നില്ല.