ഒളിവര്‍ ജിറൂഡ് ഇംഗ്ലീഷ് ക്ലബ്ബ് ചെല്‍സിയോട് ബൈ പറഞ്ഞു. ഇറ്റലിയിലെ എസി മിലാനാണ് ജിറൂഡിന്റെ പുതിയ തട്ടകം. മൂന്നു വര്‍ഷത്തെ ചെല്‍സി ബന്ധം അവസാനിപ്പിച്ചാണ് ജിറൂഡ് മിലാനിലേക്ക് കൂടുമാറിയത്. അതേസമയം, താരത്തിന്റെ കൈമാറ്റത്തുക പുറത്തുവിട്ടിട്ടില്ല. 2018 ജനുവരിയില്‍ ആഴ്‌സനലില്‍ നിന്ന് 184 കോടി രൂപ ചെലവിട്ടാണ് ജിറൂഡിനെ ചെല്‍സി വാങ്ങിയത്.
ചെല്‍സിക്കൊപ്പം എഫ് എ കപ്പ്, യൂറോപ്പ ലീഗ്, ചാമ്പ്യന്‍സ് ലീഗ് കിരീടങ്ങള്‍ നേടാന്‍ ജിറൂഡിന് സാധിച്ചു. നീലപ്പടയ്ക്കായി 110 മത്സരങ്ങളില്‍ നിന്ന് 39 ഗോളുകള്‍ നേടിയിട്ടുണ്ട്. കഴിഞ്ഞ സീസണില്‍ യൂറോപ്യന്‍ ചാംപ്യന്‍ഷിപ്പുകളില്‍ 11 ഗോളുകള്‍ സ്‌കോര്‍ ചെയ്തു. എന്നാല്‍ പ്രീമിയര്‍ ലീഗില്‍ കളിക്കാന്‍ ജിറൂഡിന് അധികം അവസരം ലഭിച്ചിരുന്നില്ല. എട്ട് പ്രീമിയര്‍ ലീഗ് മത്സരങ്ങളില്‍ മാത്രമാണ് ജിറൂഡ് സ്റ്റാര്‍ട്ടിംഗ് ഇലവനില്‍ ഇടംപിടിച്ചത്.
ജര്‍മ്മന്‍ ഫോര്‍വേഡുകളായ കായ് ഹാവെര്‍ട്ട്‌സും തിമോ വെര്‍ണറും വന്നതോടെ ജിറൂഡിന് അധികം അവസരം ലഭിക്കാതായി. ഈ സാഹചര്യത്തിലാണ് ചെല്‍സി വിടാന്‍ ജിറൂഡ് പ്രേരിതനായത്. സവിശേഷമായ നിമിഷങ്ങള്‍ സമ്മാനിച്ച ക്ലബ്ബിനും ആരാധകര്‍ക്കും സഹ താരങ്ങള്‍ക്കും പരിശീലകര്‍ക്കും ജിറൂഡ് നന്ദി അറിയിച്ചു. തെളിഞ്ഞതും സന്തോഷമുള്ളതുമായ ഹൃദയത്തോടെയാണ് ചെല്‍സിയോട് വിടപറയുന്നതെന്നും ജിറൂഡ് ട്വിറ്ററില്‍ കുറിച്ചു.