ലോകത്തിലെ ഏറ്റവും മികച്ച ക്ലബായിരുന്നു റയൽ മാഡ്രിഡ്. എന്നാൽ ഇപ്പോൾ കാര്യങ്ങൾ അങ്ങനെയല്ല. ഭേദപ്പെട്ട പ്രകടനങ്ങൾ മാത്രമാണ് ടീം നടത്തി വരുന്നത്. നിലവിലെ ലാലിഗ ജേതാക്കളും ചാമ്പ്യൻസ് ലീഗ് ജേതാക്കളും റയൽ തന്നെയാണ്. എന്നാൽ അതിനോട് നീതിപുലർത്താൻ ഇപ്പോൾ അവർക്ക് സാധിക്കുന്നില്ല. ചാമ്പ്യൻസ് ലീഗിൽ അവസാനമായി കളിച്ച അഞ്ച് മത്സരങ്ങളിൽ നിന്ന് 3 എണ്ണത്തിൽ അവർ പരാജയപ്പെടുകയായിരുന്നു.
ലിവർപൂളിനെതിരെയും തോൽവി ഏറ്റു വാങ്ങിയപ്പോൾ വിമർശകരുടെ എണ്ണം കൂടി. എന്നാൽ വിമർശകർക്കുള്ള മറുപടിയായി റയൽ മാഡ്രിഡ് താരം ജൂഡ് ബെല്ലിങ്ഹാം തന്റെ പ്രതികരണം രേഖപെടുത്തിയിരിക്കുകയാണ്.
ജൂഡ് ബെല്ലിങ്ഹാം പറയുന്നത് ഇങ്ങനെ:
” ഒരു സ്റ്റെപ്പ് മുന്നോട്ടുവച്ചാൽ രണ്ട് സ്റ്റെപ്പ് പിറകോട്ട് എന്ന സാഹചര്യത്തിലാണ് ഇപ്പോൾ റയൽ മാഡ്രിഡ് ഉള്ളത്. ശക്തരായ എതിരാളികൾക്കെതിരെ വളരെയധികം നിരാശപ്പെടുത്തുന്ന പ്രകടനവും റിസൾട്ടുമാണ് ഞങ്ങൾക്ക് ലഭിച്ചത്. ഇംഗ്ലണ്ടിലേക്ക് ഞങ്ങളുടെ മത്സരം വീക്ഷിക്കാൻ വേണ്ടി എത്തിയ എല്ലാ റയൽ ആരാധകരോടും ഞാൻ നന്ദി പറയുന്നു. അതോടൊപ്പം തന്നെ ക്ഷമയും ചോദിക്കുന്നു. ഇത് ഞങ്ങൾക്ക് മാറ്റാൻ സാധിക്കുന്നത് തന്നെയാണ്. ഞങ്ങൾ ഒരുമിച്ച് നിന്ന് പരസ്പരം പുഷ് ചെയ്ത് അടുത്ത പ്രധാനപ്പെട്ട മത്സരങ്ങൾക്ക് വേണ്ടി തയ്യാറെടുക്കണം ” ജൂഡ് ബെല്ലിങ്ഹാം പറഞ്ഞു.
ചാമ്പ്യൻസ് ലീഗിലെ മത്സരങ്ങൾ ഇനി റയൽ മാഡ്രിഡിന് നിർണായകമാണ്. മൂന്നു മത്സരങ്ങൾ മാത്രമാണ് ഇനി അവർക്ക് അവശേഷിക്കുന്നത്. നിലവിൽ പോയിന്റ് പട്ടികയിൽ ഇരുപത്തിനാലാം സ്ഥാനത്താണ് റയൽ മാഡ്രിഡ് ഉള്ളത്. അറ്റലാന്റ, സാൽസ്ബർഗ്, ബ്രെസ്റ്റ് എന്നിവരാണ് റയൽ മാഡ്രിഡിന്റെ എതിരാളികൾ.