ബ്രസീലിയൻ സൂപ്പർ താരം നെയ്മർ ജൂനിയർ സൗദി പ്രോ ലീഗ് ക്ലബ് അൽ ഹിലാൽ വിട്ടു. താരവുമായുള്ള കരാർ അൽ ഹിലാൽ റദ്ദാക്കി. നെയ്മർ തൻറെ പഴയ ക്ലബ്ബായ സാൻറോസിലേക്കാണ് അടുത്തതായി പോകുന്നത്. 2023ലാണ് നെയ്മർ ഫ്രഞ്ച് ക്ലബായ പി എസ് ജിയിൽ നിന്ന് അൽ ഹിലാലിലെത്തിയത്.
220 മില്യൺ ഡോളറിന് രണ്ട് വർഷ കരാറിലാണ് താരം അൽ ഹിലാലിലെത്തിയത്. എന്നാൽ പരിക്കുമൂലം 18 മാസങ്ങൾക്കിടയിൽ ഏഴ് മത്സരങ്ങളിൽ മാത്രമാണ് നെയ്മർ അൽ ഹിലാലിനായി കളിച്ചത്. ഇതിൽ ഒരു ഗോളും മൂന്ന് അസിസ്റ്റുകളും ഉൾപ്പെടുന്നു. പരിക്കിൽ നിന്ന് മോചിതനാകാൻ സമയമെടുക്കുന്നതിനാലാണ് അൽ ഹിലാൽ നെയ്മറിനെ ഒഴിവാക്കാൻ തീരുമാനിച്ചത്.
2003ൽ 11-ാം വയസിൽ സാന്റോസ് അക്കാദമിയിലാണ് നെയ്മറിന്റെ ഫുട്ബോൾ ജീവിതത്തിന് തുടക്കമാകുന്നത്. 2009ൽ 17-ാം വയസിൽ സാന്റോസിന്റെ സീനിയർ ടീമിനായി അരങ്ങേറ്റം കുറിച്ചു. 225 മത്സരങ്ങളിൽ നിന്നായി 136 ഗോളുകളാണ് സാന്റോസിനായി നെയ്മർ നേടിയത്. ഇതോടെ 2011ൽ ബ്രസീലിന്റെ ദേശീയ ടീമിൽ അരങ്ങേറ്റം കുറിക്കാനും നെയ്മറിന് കഴിഞ്ഞു.
2013ലെ കോൺഫഡറേഷൻ കപ്പ്, 2016ലെ റിയോ ഒളിംപിക്സിലെ സ്വർണ മെഡൽ നേട്ടം എന്നിവയാണ് ബ്രസീലിനൊപ്പം നെയ്മറിന്റെ നേട്ടങ്ങൾ. 124 മത്സരങ്ങളിൽ നിന്നായി 77 ഗോളുകളും താരം നേടി. ദേശീയ ടീമിലെയും സാന്റോസിനുമൊപ്പവുമുള്ള തകർപ്പൻ പ്രകടനം 2013ലെ നെയ്മറിനെ സ്പാനിഷ് ക്ലബ് ബാഴ്സലോണയിലെത്തിച്ചു.
ലയണൽ മെസ്സി, ലൂയിസ് സുവാരസ് എന്നിവർക്കൊപ്പം നെയ്മറിന്റെയും പേര് ഉയർന്നുവന്നു. 186 മത്സരങ്ങളിൽ നിന്നായി 105 ഗോളുകളാണ് നെയ്മർ ബാഴ്സയിൽ നേടിയത്. 2015ലെ ചാംപ്യൻസ് ലീഗ് ഉൾപ്പടെയുള്ള കിരീടനേട്ടങ്ങളും ബാഴ്സയിൽ സ്വന്തമാക്കാൻ നെയ്മറിന് കഴിഞ്ഞു. 2017ൽ ഫുട്ബോൾ ലോകത്തെ ഏറ്റവും മികച്ച താരങ്ങളിലൊരാളായ നെയ്മറിനെ 222 മില്യൺ യൂറോയ്ക്ക് ഫ്രഞ്ച് ക്ലബ് പി എസ് ജി സ്വന്തമാക്കി. 173 മത്സരങ്ങൾ ഫ്രഞ്ച് ക്ലബിനായി നെയ്മർ കളിച്ചിട്ടുണ്ട്. 2020 മുതൽ വിടാതെ പിന്തുടരുന്ന പരിക്കാണ് ഇതിഹാസ സമാനമായ നെയ്മറിന്റെ കരിയറിന് തിരിച്ചടിയാകുന്നത്.