ഇംഗ്ലീഷ് പ്രീമിയര്‍ ലീഗിലെ നഗരവൈരികളുടെ പോരാട്ടത്തില്‍ മാഞ്ചസ്റ്റര്‍ യുണൈറ്റഡിനെ കീഴടക്കി മാഞ്ചസ്റ്റര്‍ സിറ്റി. ഒന്നിനെതിരേ രണ്ടു ഗോളുകള്‍ക്കാണ് യുണൈറ്റഡിന്റെ തട്ടകമായ ഓള്‍ഡ് ട്രഫോര്‍ഡില്‍ സിറ്റി വിജയക്കൊടി പാറിച്ചത്. ഇതോടെ, പ്രീമിയര്‍ ലീഗില്‍ 14ാം ജയവുമായി പെപ് ഗാര്‍ഡിയോള പരിശീലിപ്പിക്കുന്ന സിറ്റി ഒന്നാം സ്ഥാനത്ത് തുടരുകയാണ്.
മത്സരത്തിന്റെ ആദ്യ പകുതിയുടെ 43ാം മിനുട്ടില്‍ ഡേവിഡ് സില്‍വയുടെ ഗോളിന് സിറ്റിയാണ് ആദ്യം തന്നെ മുന്നിലായത്. എന്നാല്‍, ആദ്യ പകുതിയുടെ ഇഞ്ച്വുറി ടൈമില്‍ സിറ്റി പ്രതിരോധത്തിന്റെ വീഴ്ച മുതലെടുത്ത് മാര്‍ക്കസ് റാഷ്‌ഫോര്‍ഡ് യുണൈറ്റഡിനെ ഒപ്പമെത്തിച്ചു. രണ്ടാം പകുതിയുടെ 54ാം മിനുട്ടില്‍ സിറ്റിയുടെ പ്രതിരോധതാരം നിക്കൊളാസ് ഒറ്റമെന്‍ഡിയുടെ ഗോള്‍ യുണൈറ്റഡിന്റെ വിധിയെഴുതി.
ഡെര്‍ബി എന്നതിന് പുറമെ ലോകത്തെ ഏറ്റവും മികച്ച രണ്ടു പരിശീലകര്‍ നേര്‍ക്കുനേര്‍ വരുന്ന മത്സരം എന്ന പ്രത്യകതയും സിറ്റി-യുണൈറ്റഡ് പോരാട്ടത്തിനുണ്ടായിരുന്നു. ജോസ് മൊറീഞ്ഞോ പരിശീലിപ്പിച്ച യുണൈറ്റഡിന് ജയം അകന്നു.
16 മത്സരങ്ങളില്‍ നിന്ന് 46 പോയിന്റുള്ള സിറ്റിയാണ് പ്രീമിയര്‍ ലീഗില്‍ ഇതുവരെ മുന്നിലുള്ളത്. ഇത്രയും മത്സരങ്ങളില്‍ നിന്ന് 35 പോയിന്റുള്ള മാഞ്ചസ്റ്റര്‍ യുണൈറ്റഡ് രണ്ടാം സ്ഥാനത്തുമുണ്ട്.