ഫുട്ബോൾ താരങ്ങളുടെ പ്രകടനത്തിൽ അവർ ധരിക്കുന്ന ജേർസിക്ക് പങ്ക് വഹിക്കാൻ ഉണ്ടോ? യാതൊരു സംശയവും ഇല്ലാതെ തന്നെ പറയാം ഉണ്ടെന്ന്. നിലവാരമില്ലാത്ത ജേഴ്സി ധരിച്ച് കളിക്കുന്നത് കളിക്കാരുടെ പ്രകടന നിലവാരത്തെ കാര്യമായി ബാധിക്കാറുണ്ട്. ഇപ്പോഴിതാ പുതിയ ജഴ്‌സി മോശം ആണെന്നും അത് കളിക്കളത്തിൽ ബുദ്ധിമുട്ട് ഉണ്ടാക്കുന്നു എന്നും ഉള്ള അഭിപ്രായവുമായി രംഗത്ത് വന്നിരിക്കുന്നത് ആസ്റ്റൺ വിലയുടെ താരങ്ങളാണ്.
കാസ്റ്റോർ എന്ന കമ്പനി നിർമിക്കുന്ന ജേഴ്സിയാണ് ആസ്റ്റൺ വില്ല ഉപയോഗിക്കുന്നത്. എന്നാൽ ആ ജേഴ്സികൾ കളി കുറച്ചുസമയം ആകുമ്പോൾ തന്നെ വിയർപ്പ് കൊണ്ട് നിറയുമെന്നും ഇത് അസ്വസ്ഥത ഉണ്ടാക്കുമെന്നുമാണ് താരങ്ങളുടെ പരാതി. വിയർപ്പ് കൊണ്ട് നിറയുന്ന ജേഴ്സി ശരീരത്തോട് കൂടുതലായി ഒട്ടി വരുനെന്നും ഇത് ശരിക്കും തളർച്ച ഉണ്ടാക്കും എന്നുമാണ് താരങ്ങൾ പറഞ്ഞത്.
ആസ്റ്റൺ വില്ലയുടെ ടീം കഴിഞ്ഞ ആഴ്ച ലെഗിയ വാർസോയ്‌ക്കെതിരായ യൂറോപ്പ ലീഗ് മത്സരങ്ങളിൽ സ്പോൺസർ രഹിത ജേഴ്സികൾ ധരിച്ചപ്പോൾ അവരുടെ വിയർപ്പ് പ്രശ്നം വളരെ വ്യക്തമായി.“കളിക്കാർ നനഞ്ഞ ടീ-ഷർട്ടുകളിൽ കളിക്കേണ്ടതുണ്ട്, ഇത് പരിഹരിക്കപ്പെടേണ്ട ഒരു പ്രശ്നമാണ്. ഇത് എല്ലാ സീസണിലും തുടരാനാവില്ല. കളിക്കാർ ഏകദേശം 10 മിനിറ്റിനുശേഷം നീന്തൽക്കുളത്തിൽ ചാടിയതുപോലെ തോന്നുന്നു” ഒരു ആസ്റ്റൺ വില്ല താരം തന്റെ പ്രതികരണമായി പറഞ്ഞു.
നിലവിൽ ഇംഗ്ലീഷ് പ്രീമിയർ ലീഗ് പോയിന്റ് പട്ടികയിൽ ആറാം സ്ഥാനത്താണ് ആസ്റ്റൺ വില്ലയുടെ സ്ഥാനം. താരങ്ങൾക്ക് ബുദ്ധിമുട്ട് ഉണ്ടാക്കുന്ന ജേഴ്സി മാറ്റി മികച്ച ജേഴ്സി കിട്ടുമെന്നാണ് ടീം പ്രതീക്ഷിക്കുന്നത്.
