വിദേശ ക്ലബ്ബുകളിലേക്ക് ചേക്കേറാനൊരുങ്ങുന്ന ഇന്ത്യന്‍ അണ്ടര്‍ 17 ഗോള്‍ കീപ്പര്‍ ധീരജ് സിങ് മൊയ്‌റാങ്‌തെം ബ്ലാസ്റ്റേഴ്സ് ജെഴ്‌സിയില്‍! ഡല്‍ഹി ഡൈനാമോസുമായി നടന്ന കേരള ബ്ലാസ്‌റ്റേഴ്‌സിന്റെ ഐഎസ്എല്‍ മത്സരത്തില്‍ മഞ്ഞ ജെഴ്‌സിയണിഞ്ഞ താരത്തെ കണ്ടതാണ് കേരള ബ്ലാസ്റ്റേഴ്സ് ആരാധകരെ ആവേശത്തിലാക്കിയിരിക്കുന്നത്.
ഇന്ത്യയുടെ അണ്ടര്‍ 20, 17 താരങ്ങള്‍ കളിക്കുന്ന ഐ ലീഗ് ക്ലബ്ബായ ഇന്ത്യന്‍ ആരോസിലായിരുന്നു ഇതുവരെ ധീരജ് ഗ്ലൗ അണിഞ്ഞ ധീരജ് ആരോസുമായി കരാര്‍ പുതുക്കുന്നില്ലെന്നും വിദേശ ക്ലബ്ബുകളിലേക്ക് പോവാനൊരുങ്ങുകയാണ്. ഇതിനിടയിലാണ് ബ്ലാസ്റ്റേഴ്സ് ജെഴ്‌സിയില്‍ താരത്തെ സ്‌റ്റേഡിയത്തില്‍ കണ്ടത്. അതേസമയം, വിദേശത്തേക്ക് തിരിക്കുന്നതിന് മുമ്പ് കേരള ബ്ലാസ്റ്റേഴ്‌സിനൊപ്പം താരം പരിശീലനം നടത്തുമെന്നാണ് റിപ്പോര്‍ട്ടുകള്‍.
ബ്ലാസ്റ്റേഴ്സ് പരിശീലകനായ ഡേവിഡ് ജെയിംസിന്റെ കീഴില്‍ പരിശീലനം നടത്താനാണ് ധീരജ് സിങ് ബ്ലാസ്റ്റേഴ്‌സിനൊപ്പം ചേര്‍ന്നത്. യൂറോപ്യന്‍ വിസ ലഭിക്കുന്നത് വരെ ബ്ലാസ്റ്റേഴ്‌സിനൊപ്പം പരിശീലനം നടത്തും.
നേരത്തെ തന്നെ സ്‌കോട്ടിഷ് പ്രീമിയര്‍ഷിപ്പിലെ മദര്‍വെല്‍ എഫ് സി, ഇംഗ്ലീഷ് ലീഗ് വണ്‍ ക്ലബ്ബ് ചാര്‍ട്ടന്‍ അത്‌ലറ്റിക് ക്ലബ്, മേജര്‍ ലീഗ് സോക്കര്‍ ക്ലബ്ബ് ടോറോന്റോ എഫ് സി എന്നിവ നിന്ന് ധീരജിനെ സ്വന്തമാക്കാന്‍ രംഗത്ത് വന്നിരുന്നു. ഇംഗ്ലീഷ് പ്രീമിയര്‍ ലീഗ് ക്ലബ്ബായ വെസ്റ്റ് ഹാം യൂണൈറ്റഡും ധീരജിന് രംഗത്തുണ്ട്. മദര്‍വെല്‍ എഫ് സിയിലേക്കുള്ള ട്രയല്‍സ് നടത്താന്‍ വിസ ശെരിയായാല്‍ ധീരജ് സ്‌കോട്‌ലന്‍ഡിലേക്ക് തിരിക്കും. അതുവരെ കേരള ബ്ലാസ്റ്റേഴ്‌സില്‍ പോള്‍ രാഹുബ്ക്ക, സന്ദീപ്പ് നന്ദി, ബ്ലാസ്റ്റേര്‍സ് ഹെഡ് കോച്ച് കൂടിയായ ഡേവിഡ് ജെയിംസില്‍ നിന്നും ധീരജ് പരിശീലനം തേടും.