ശനിയാഴ്ച യുവേഫ നേഷൻസ് ലീഗിൽ പോളണ്ടിനെതിരെ ഒരു ബൈസിക്കിൾ കിക്കിലൂടെ തകർപ്പൻ ഗോൾ നേടിയതിന് ശേഷം തൻ്റെ വിരമിക്കലിനെ കുറിച്ച് പോർച്ചുഗൽ ഫുട്ബോൾ ഇതിഹാസം ക്രിസ്റ്റ്യാനോ റൊണാൾഡോ തുറന്നുപറഞ്ഞു. അതേ മത്സരത്തിൽ രണ്ട് ഗോളുകൾ നേടിയ റൊണാൾഡോ ഏറ്റവും കൂടുതൽ അന്താരാഷ്ട്ര വിജയങ്ങൾ നേടിയ കളിക്കാരനായി(132) പുരുഷ ഫുട്ബോൾ ചരിത്രത്തിൽ ഇടപിടിച്ചു. മുൻ റയൽ മാഡ്രിഡ് സഹതാരമായ സെർജിയോ റാമോസിനെയാണ് (131) റൊണാൾഡോ ഈ നേട്ടം കൈവരിക്കാൻ മറികടന്നത്. ഒരു ഫുട്ബോൾ ഇതിഹാസം എന്ന പദവി ഉറപ്പിച്ചുകൊണ്ട് അന്താരാഷ്ട്ര ഫുട്ബോളിലെ എക്കാലത്തെയും മികച്ച സ്കോറർ എന്ന നിലയിലും അദ്ദേഹം ലീഡ് ഉയർത്തി.
2025 ഫെബ്രുവരിയിൽ 40 വയസ്സ് തികയുന്ന റൊണാൾഡോ, തനിക്ക് സമയത്തെ തോൽപ്പിക്കാൻ കഴിയില്ലെന്നും, താമസിയാതെ പ്രായത്തിൻ്റെ യാഥാർത്ഥ്യവും പ്രൊഫഷണൽ ഫുട്‌ബോളിൻ്റെ ആവശ്യങ്ങളും തന്നെ പിടികൂടുമെന്നും പറഞ്ഞു. “എനിക്ക് ആസ്വദിക്കണം. റിട്ടയർമെൻ്റിനായി ആസൂത്രണം ചെയ്യുകയാണ്. അത് സംഭവിക്കണമെങ്കിൽ, ഒന്നോ രണ്ടോ വർഷത്തിനുള്ളിൽ ഉണ്ടാകും. എനിക്ക് ഉടൻ 40 വയസ്സ് തികയുകയാണ്. എനിക്ക് ഫുട്ബോൾ ശരിക്കും ആസ്വദിക്കാൻ ആഗ്രഹമുണ്ട്, എനിക്ക് പ്രചോദനം തോന്നുന്നിടത്തോളം ഞാൻ തുടരും.എനിക്ക് പ്രചോദനം തോന്നാത്ത ദിവസം ഞാൻ വിരമിക്കും. ”റൊണാൾഡോ മത്സര ശേഷം പറഞ്ഞു.
എന്നിരുന്നാലും, 1,000 ഗോളുകൾ നേടുന്നതിനെക്കുറിച്ചുള്ള ഊഹാപോഹങ്ങൾ അദ്ദേഹം തള്ളിക്കളഞ്ഞു: “1000 കരിയർ ഗോളുകളുടെ റെക്കോർഡിനെക്കുറിച്ച് ഞാൻ ചിന്തിക്കുന്നില്ല. തീർച്ചയായും, നിങ്ങൾ എല്ലായ്പ്പോഴും ചരിത്രം സൃഷ്ടിക്കാൻ ആഗ്രഹിക്കുന്നു. പക്ഷേ ഞാൻ ഇപ്പോൾ ആ റെക്കോർഡിൽ ശ്രദ്ധ കേന്ദ്രീകരിക്കുന്നില്ല.