ബാഴ്‌സലോണയില്‍ നിന്ന് ലോക റെക്കോര്‍ഡ് തുകയ്ക്ക് പിഎസ്ജിയിലെത്തിയ നെയ്മര്‍ പിഎസ്ജിയില്‍ തൃപ്തനല്ല എന്ന വാര്‍ത്തകള്‍ക്കിടയില്‍ വെളിപ്പെടുത്തലുമായി കവാനി. നെയ്മറും കവാനിയുമായിരുന്നു പിഎസ്ജിയിലെ സെറ്റ് പീസ് വിവാദത്തിലുണ്ടായിരുന്നത്. വമ്പന്‍ തുകയ്ക്ക് വന്നതിനാല്‍ തന്നെ നെയ്മറിന് കൂടുതല്‍ സ്വാധീനവും സ്വാതന്ത്ര്യവും ക്ലബ്ബിലുണ്ടെന്ന് ആരോപണവുമായും കളിക്കാര്‍ രംഗത്തു വന്നതായി റിപ്പോര്‍ട്ടുകളുണ്ടായിരുന്നു. തുടര്‍ന്ന് പിഎസ്ജിയില്‍ കളിക്കാര്‍ തമ്മിലടിയാണെന്ന് വരെ സൂചനകള്‍ വന്നു.
എന്നാല്‍, പിഎസ്ജിയില്‍ തമ്മിലടിയാണെന്ന് പറഞ്ഞുള്ള വാര്‍ത്തകളെല്ലാം നിഷേധിച്ച കവാനി നെയ്മറുമായി അടുത്ത സൗഹൃദമാണുള്ളതെന്നും വ്യക്തമാക്കി. ക്ലബ്ബിന്റെ ടോപ്പ്‌സ്‌കോറര്‍മാരില്‍ ഒരാളാണ് നിലവില്‍ കവാനി. സെറ്റ്പീസ് തര്‍ക്കം ടീമിനകത്ത് പ്രശ്‌നങ്ങളൊന്നുമുണ്ടാക്കിയില്ല. ഗ്രൗണ്ടില്‍ ഞങ്ങള്‍ പ്രഫണലുകളാണ്. ടീം വര്‍ക്കിലാണ് ഞങ്ങളുടെ ഗോളുകള്‍ പിറക്കുന്നത്. ദി ടെലിഗ്രാഫിന് നല്‍കിയ അഭിമുഖത്തില്‍ കവാനി വ്യക്തമാക്കി.
ബാഴ്‌സയില്‍ നിന്ന് നെയ്മര്‍ ക്ലബ്ബുമായി ഒപ്പുവെച്ചപ്പോള്‍ ഞങ്ങള്‍ എല്ലാവരും സന്തോഷിച്ചു. ലോകോത്തര താരം ഞങ്ങളുടെ ടീമിലെത്തുന്നതിന്റെ ആവേശമായിരുന്നു ഞങ്ങള്‍ക്ക്. നെയ്മറിന്റെ സാന്നിധ്യം ക്ലബ്ബിനും ഏറെ ഗുണം ചെയ്യും. കവാനി കൂട്ടിച്ചേര്‍ത്തു.