ഡഹിക്കെതിരായ തകര്‍പ്പന്‍ ജയത്തിന് ശേഷം ആരാധകരെ പ്രത്യഭിവാദനം ചെയ്ത് ബ്ലാസ്റ്റേഴ്സ് ടീം അംഗങ്ങള്‍. മത്സരശേഷം ആരാധകരെ അഭിവാദ്യം ചെയ്താണ് കളിക്കാര്‍ മടങ്ങിയത്.
ദല്‍ഹിയെ ഒന്നിനെതിരെ മൂന്നുഗോളുകള്‍ക്ക് തകര്‍ത്താണ് ബ്ലാസ്റ്റേഴ്സ് വിജയിച്ച് കയറിയത്. ഡല്‍ഹിയിലെ കൊടും തണുപ്പിനെ വകവെക്കാതെ പന്തിനു മുകളില്‍ മികച്ച നിയന്ത്രണം കാത്തുസൂക്ഷിച്ച ഹ്യൂം ആദ്യ സീസണിലെ പരിശീലകനും സഹതാരവുമായിരുന്ന ഡേവിഡ് ജെയിംസിന്റെ മടങ്ങി വരവ് ആഘോഷിക്കുകയായിരുന്നു.
11-ാം മിനിറ്റിലെ ഗോളിന് ശേഷം 78-ാം മിനിറ്റിലും 83-ാം മിനിറ്റിലും ഹ്യൂം ലക്ഷ്യം കണ്ടു. ഐ.എസ്.എല്‍ കരിയറില്‍ ഹ്യൂമിന്റെ മൂന്നാമത്തെ ഹാട്രിക്കാണിത്.
ജെയിംസിന്റെ തിരിച്ചുവരവിലെ മത്സരത്തില്‍ ഉശിരന്‍ സമനിലയും രണ്ടാം മത്സരത്തില്‍ അത്യുഗ്രന്‍ വിജയവുമാണ് ടീം സ്വന്തമാക്കിയത്. സൂപ്പര്‍താരം ഇയാന്‍ ഹ്യൂം ഫോമിലേക്കുയര്‍ന്നതു കണ്ട മത്സരത്തിനുശേഷം ബ്ലാസ്റ്റേഴ്സിന്റെ പന്ത്രണ്ടാം കളിക്കാരായ ആരാധകരും സന്തോഷത്തിലാണ്.
തുടരെ തുടരെ ഹോം മാച്ചില്‍ വിജയം അകന്നു നിന്നെങ്കിലും ദല്‍ഹിയിലെ എവേ മാച്ചിലും മഞ്ഞപ്പടയെ പ്രോത്സാഹിപ്പിക്കാന്‍ ആരാധകര്‍ മറന്നില്ല. ദല്‍ഹിയിലെ കൊടും തണുപ്പില്‍ ടീമിനെ സ്വീകരിക്കാന്‍ ഉറക്കമൊഴിച്ചതുപോലെ ദല്‍ഹിയിലും മഞ്ഞപ്പട ആര്‍ത്തലച്ചുകൊണ്ടിരുന്നു.ഇവര്‍ക്കാണ് ഹ്യൂമേട്ടന്‍ തന്നെ മിന്നുന്ന പ്രകടനം പുറത്തെടുത്ത് കേരളത്തെ വിജയിപ്പിച്ചത്.