ഐപിഎല്‍ 15ാം സീസണില്‍ എല്ലാ മേഖലയിലും പരാജയമായിരിക്കുകയാണ് മുംബൈ ഇന്ത്യന്‍സ്. തുടര്‍ച്ചയായ തോല്‍വികളുമായി സീസണ്‍ പകുതി മാത്രം ആയപ്പോള്‍ തന്നെ മുംബൈ പുറത്താകല്‍ ഉറപ്പിച്ചു. ഇതിനു പിന്നാലെ മുംബൈയുടെ പരിശീലക സംഘത്തിനെതിരെയും വിമര്‍ശനങ്ങള്‍ ഉയര്‍ന്നു. മോശം ബോളിംഗില്‍ വിമര്‍ശനം നേരിട്ടത് ടീമിന്റെ ഡയറക്ടര്‍ ഓഫ് ക്രിക്കറ്റ് ഓപ്പറേഷന്‍സായ സഹീര്‍ ഖാനാണ്. ഇപ്പോഴിതാ ഇക്കാര്യത്തില്‍ കൈകഴുകിയിരിക്കുകയാണ് താരം. ടീമില്‍ തന്റെ ജോലി എന്തെന്ന് വ്യക്തമാക്കിയാണ് താരത്തിന്റെ മറുപടി.
മുംബൈ ഇന്ത്യന്‍സ് പങ്കുവെച്ച വീഡിയോയിലാണ് ടീമിലെ തന്റെ ഉത്തരവാദിത്തങ്ങളെക്കുറിച്ച് സഹീര്‍ തുറന്ന് പറഞ്ഞത്. താരങ്ങളെ പഠിക്കുകയാണ് ടീമിലെ തന്റെ ജോലിയെന്ന് സഹീര്‍ വെളിപ്പെടുത്തി.
‘സംസാരത്തിലൂടെയാണ് ആളുകളെ പഠിക്കാന്‍ സാധിക്കുന്നത്. നിങ്ങളുടെ പ്രശ്നങ്ങളോ അനുഭവങ്ങളോ പങ്കുവെക്കുമ്പോള്‍ വളരെ വേഗത്തില്‍ പ്രശ്നങ്ങളില്‍ നിന്ന് പുറത്തുവരാനാവും. അതുകൊണ്ട് തന്നെ ഓരോ താരങ്ങളെക്കുറിച്ചും കൃത്യമായി അറിയേണ്ടതായുണ്ട്. ഓരോരുത്തര്‍ക്കും ഓരോ കഥയാണ് പറയാനുണ്ടാവുക. അതുകൊണ്ട് തന്നെ അവര്‍ എവിടെ നിന്നാണ് വന്നത് എന്താണ് അവര്‍ ആഗ്രഹിക്കുന്നതെന്നെല്ലാം കണ്ടെത്താനാണ് ശ്രമിക്കുന്നത്.’
‘പൊതുവേ സാങ്കേതികമായി മാത്രമെ ഇത്തരം ചര്‍ച്ചകള്‍ നടക്കാറുള്ളു. മത്സരത്തിലെ മാനസികാവസ്ഥ മറ്റൊരു വിഭാഗം തന്നെയാണ്. ആര്‍ക്കെങ്കിലും എന്നെക്കൊണ്ട് എന്തെങ്കിലും ഉപകാരം ചെയ്യാനായാല്‍ എനിക്കത് വലിയ സംതൃപ്തി നല്‍കും’ സഹീര്‍ പറഞ്ഞു.