പതിനഞ്ചു വര്ഷത്തെ ഐപിഎല് ചരിത്രത്തില് ആര്സിബിയുടെ പുരുഷ ടീമിന് നേടാനാകാത്തതാണ് രണ്ടാം സീസണില് തന്നെ ആര്സിബിയുടെ വനിതാ ടീം നേടിയെടുത്തിരിക്കുകയാണ്. ഡല്ഹി അരുണ് ജെയ്റ്റ്ലി സ്റ്റേഡിയത്തില് നടന്ന കിരീടപ്പോരാട്ടത്തില് ഡല്ഹി ക്യാപിറ്റല്സിനെ എട്ടു വിക്കറ്റിന് തോല്പിച്ചാണ് സ്മൃതി മന്ഥാനയും സംഘവും കിരീടം ചൂടിയത്.
ഇപ്പോഴിതാ കിരീട നേട്ടത്തിന് പിന്നാലെ ആര്സിബി വനിതാ ടീമിന് അഭിനന്ദവും പുരുഷ ടീമിന് മുന്നറിയിപ്പുമായും രംഗത്തെത്തിയിരിക്കുകയാണ് ടീമിന്റെ ഉടമയായ വിജയ് മല്യ. ‘വനിതാ പ്രീമിയര് ലീഗ് കിരീടം നേടിയ ആര്സിബി വനിതാ ടീമിന് ഹൃദയത്തില് നിന്ന് അഭിനന്ദനം. വളരെക്കാലമായി നേടാത്ത കിരീടം പുരുഷ ടീമിനും നേടാനായാല് അത് ഇരട്ടി സന്തോഷം നല്കും. എല്ലാ വിധ ആശംസകളും’ എന്നാണ് വിജയ് മല്യ സോഷ്യല് മീഡിയയില് കുറിച്ചത്.
ആര്സിബി വനിതാ ടീം കിരീടം നേടിയതോടെ പുരുഷ ടീമിന് ഇത് ചെറിയ സമ്മര്ദ്ദമൊന്നുമല്ല നല്കുക. ഏവരും എന്തിന് എതിര് ടീമിന്റെ ആരാധകര്പോലും ആര്സിബി ഒന്ന് കിരീടം ചൂടികാണാന് ആഗ്രഹിക്കുന്നവരാണ്. ഇത്തവണയെങ്കിലും അത് സാധിക്കുമോ എന്നാണ് അറിയേണ്ടത്.
ഫൈനല് മത്സരത്തില് ഡല്ഹി ഉയര്ത്തിയ 113 റണ്സ് വിജയലക്ഷ്യം ബാംഗ്ലൂര് മൂന്നു പന്തുകള് ബാക്കി നില്ക്കെ മറികടന്നു. ക്യാപ്റ്റന് സ്മൃത മന്ഥാന (39 പന്തില് 31), സോഫ് ഡിവൈന് (27 പന്തില് 32), എലിസി പെറി ( 37 പന്തില് 35*) എന്നിവരുടെ ബാറ്റിംഗ് മികവിലാണ് ബാംഗ്ലൂര് കപ്പില് മുത്തമിട്ടത്. ഡല്ഹിയുടെ ചിറകരിഞ്ഞ മോളീനക്സിന്റെ മൂന്നു വിക്കറ്റുകളും ശ്രേയങ്ക പാട്ടീലിന്റെ നാലു വിക്കറ്റുകളും മത്സരത്തില് നിര്ണായകമായി.