ശ്രീലങ്കയ്ക്ക് എതിരേയുള്ള ട്വന്റി20 പരമ്പരയിലെ മൂന്ന് മത്സരങ്ങളും ഇന്ത്യ ജയിച്ചപ്പോര്‍ മുന്ന് ഇന്നിംഗ്‌സിലും നിര്‍ണ്ണായകമായ ബാറ്റിംഗ് കാഴ്ചവെച്ചത് ശ്രേയസ് അയ്യരായിരുന്നു. മൂന്ന് കളിയിലും മൂന്നാം നമ്പറില്‍ ബാറ്റ് ചെയ്യാനെത്തിയ താരത്തിന്റെ കൂറ്റനടികള്‍ ഇന്ത്യന്‍ സ്‌കോറില്‍ വലിയ ചലനം ഉണ്ടാക്കുകയും താരത്തിന് വ്യക്തിഗതമായി അര്‍ദ്ധ സെഞ്ച്വറികള്‍ നല്‍കുകയും ചെയ്തു. ഇന്ത്യന്‍ ടീമില്‍ മുന്‍ നായകന്‍ വിരാട് കോഹ്ലി ബാറ്റ് ചെയ്യുന്ന പൊസിഷനില്‍ സ്ഥിരതയാര്‍ന്ന പ്രകടനം കാഴ്ചവെച്ച താരമാണ് ശ്രേയസ് അയ്യര്‍.
ഇപ്പോഴിതാ തനിക്ക് ഇഷ്ടപ്പെട്ട ബാറ്റിങ് പൊസിഷനെക്കുറിച്ച് പറഞ്ഞിരിക്കുകയാണ് ശ്രേയസ്. ഏത് പൊസിഷനില്‍ ബാറ്റ് ചെയ്യണമെന്ന ഒരു തെരഞ്ഞെടുപ്പ് വന്നാല്‍ തീര്‍ച്ചയായും ഞാന്‍ മൂന്നാം സ്ഥാനമായിരിക്കും ഏറ്റെടുക്കുക എന്ന് താരം പറയുന്നു. ഈ ഫോര്‍മാറ്റില്‍ കളിക്കുമ്പോള്‍ നിങ്ങളുടെ ഇന്നിങ്‌സ് ഏറ്റവും വേഗത്തിലാക്കാന്‍ കഴിയുന്ന ഒരേയൊരു സ്ഥലമാണ് ടോപ്പ് ത്രീയെന്നും താരം പറയുന്നു. ഇപ്പോള്‍ ടീമിലെ എന്റെ ബാറ്റിങ് പൊസിഷനെക്കുറിച്ച് ചിന്തിക്കുന്നില്ലെന്നും ടി20 ലോകകപ്പിന് മുന്നോടിയായി മികച്ച ഫോം നിലനിര്‍ത്തുകയാണ് മുന്നിലുള്ള കാര്യമെന്നും താരം പറയുന്നു.
ഓസ്‌ട്രേലിയയില്‍ നടക്കുന്ന ടി20 ലോകകപ്പിനുള്ള ഇന്ത്യന്‍ സംഘത്തില്‍ സ്ഥാനം ഉറപ്പിച്ചതായി തോന്നുന്നുണ്ടോ എന്ന ചോദ്യത്തിന് അക്കാര്യം ഇപ്പോള്‍ പറയാനാകില്ലെന്നും എന്നാല്‍ ഫോം നിലനിര്‍ത്താനുള്ള ശ്രമത്തിലാണെന്നും താരം പറഞ്ഞു. ‘നിലവിലെ ഇന്ത്യന്‍ ടീമില്‍ സ്ഥാനം ഉറപ്പാക്കാന്‍ കടുത്ത മത്സരം തന്നെ നടക്കുന്നുണ്ട്. അതിനാല്‍ തന്നെ കിട്ടുന്ന അവസരങ്ങള്‍ സമര്‍ഥമായി ഉപയോഗിക്കുകയും ആസ്വദിച്ച് കളിക്കലുമാണ് ലക്ഷ്യമിടുന്നത്.’ ‘എനിക്ക് മത്സരങ്ങള്‍ ഫിനിഷ് ചെയ്യാന്‍ ഇഷ്ടമാണ്. പിച്ചിലേക്ക് പോകുമ്പോഴെല്ലാം അതെന്റെ ഉള്ളിലുണ്ടാകുമെന്നും താരം വ്യക്തമാക്കി.