യു.എ.യില് നടന്ന ഐ.പി.എല് സീസണില് ബാംഗ്ലൂര് നായകന് വിരാട് കോഹ്ലിയും മുംബൈയുടെ ഹിറ്റ് ബാറ്റ്സ്മാന് സൂര്യകുമാര് യാദവും പരസ്പരം കൊമ്പു കോര്ത്ത് ഏറെ ചര്ച്ചയായിരുന്നു. മികച്ച രീതിയില് ബാറ്റ് ചെയ്യുകയായിരുന്ന സൂര്യയെ പ്രകോപിക്കാനുള്ള ഭാഗമായായിരുന്നു കോഹ്ലിയുടെ സ്ലെഡ്ജിംഗ്. കോഹ്ലി അന്ന് തന്നെ അത്തരത്തില് പ്രകോപിപ്പിച്ചതില് താന് ഏറെ സന്തോഷവാനായിരുന്നു എന്നാണ് സൂര്യ പിന്നീട് പറഞ്ഞത്.
“അദ്ദേഹം എന്നെ സ്ലെഡ് ചെയ്തതില് ഞാന് സന്തോഷവാനായിരുന്നു. കാരണം, ഞാന് ക്രീസില് തുടര്ന്നാല് ഞങ്ങള് മത്സരത്തില് വിജയിക്കും. മറിച്ച് എന്റെ വിക്കറ്റ് കിട്ടിയാല് ജയിക്കാനുള്ള അവസരം അവര്ക്കും ഉണ്ടെന്ന് കോഹ്ലിക്ക് അറിയാമായിരുന്നു. എന്റെ വിക്കറ്റ് വീഴ്ത്തുന്നതിലൂടെ ഞങ്ങളെ തളര്ത്തി അവര്ക്ക് കാര്യങ്ങള് അനുകൂലമാക്കാനായിരുന്നു കോഹ്ലിയുടെ ശ്രമം. എന്നോട് മാത്രമല്ല, തന്റെ എതിരാളികളായ എല്ലാ ബാറ്റ്സ്മാന്മാരോടും കോഹ്ലിയുടെ സമീപനം ഇങ്ങനെയാണ്” സൂര്യകുമാര് പറഞ്ഞു.
2020 ലെ ഐ.പി.എല്ലില് മുംബൈ ഇന്നിംഗ്സിന്റെ 13ാം ഓവറിലായിരുന്നു സംഭവം. ഉജ്ജ്വല ഇന്നിംഗ്സുമായി ക്രീസിലുണ്ടായിരുന്ന സൂര്യകുമാര് വെറ്ററന് പേസര് ഡെയ്ല് സ്റ്റെയ്നിന്റെ ആ ഓവറില് മൂന്നു ബൗണ്ടറികള് പായിച്ചു. ഇതോടെ സമ്മര്ദ്ദത്തിലായ കോഹ്ലി ഓവറിനു ശേഷം കണ്ണുരുട്ടി സൂര്യകുമാറിന്റെ സമീപത്തേക്ക് വരികയായിരുന്നു. കണ്ണുരുട്ടലിനെ അതേ നാണയത്തില് നേരിട്ട സൂര്യകുമാര് കോഹ്ലിയില് നിന്ന് മുഖമെടുക്കാതെ ക്രീസില് തന്നെ നിന്നു.
ഇപ്പോഴിതാ ട്വിറ്റര് ലോകം കോഹ്ലിക്ക് നന്ദി പറയുകയാണ്, കോഹ്ലി സ്ലെഡ്ജ് ചെയ്ത വാശിയിലാണ് സൂര്യകുമാരിലെ വീര്യം ക്രിക്കറ്റ് ലോകം കണ്ടത്. അതിന് സഹായിച്ച കോഹ്ലി അഭിനന്ദനം അർഹിക്കുന്നു.
അപ്പോള് 25 ബോളില് 40 റണ്സെന്ന നിലയിലായിരുന്നു സൂര്യകുമാര്. തുടര്ന്നും മികച്ച ഷോട്ടുകളിലൂടെ കളി തുടര്ന്ന സൂര്യകുമാര് 79 റണ്സെടുത്ത് പുറത്താകാതെ നിന്ന് മുംബൈ ജയം നേടി കൊടുത്തു.