ഐപിഎല് പ്ലേഓഫിലെ ക്വാളിഫയര് 1 മത്സരത്തില് ആദ്യ ബാറ്റിങ്ങിന് ഇറങ്ങിയ പഞ്ചാബ് കിങ്സിന് കൂട്ടതകര്ച്ച. 10 ഓവറുകള് പൂര്ത്തിയാകുന്നതിന് മുന്പേ ആറ് വിക്കറ്റുകളാണ് പഞ്ചാബിന് നഷ്ടമായിരിക്കുന്നത്. ഓപ്പണര് പ്രിയാന്ഷ് ആര്യയെ പുറത്താക്കി യഷ് ദയാലാണ് ആര്സിബിക്ക് ആദ്യത്തെ ബ്രേക്ക്ത്രൂ നല്കിയത്. ക്രൂണാല് പാണ്ഡ്യക്ക് ക്യാച്ച് നല്കിയായിരുന്നു പ്രിയാന്ഷിന്റെ പുറത്താവല്. താരത്തെ പുറത്താക്കിയതില് വിരാട് കോഹ്ലി പ്രധാന പങ്കാണ് വഹിച്ചിരുന്നത്. വിക്കറ്റ് വീഴുംമുന്പ് ഫീല്ഡ് സെറ്റ് ചെയ്തത് കോഹ്ലിയായിരുന്നു.
പ്രിയാന്ഷ് അടുത്ത പന്തില് കവര് ഡ്രൈവിനായി ശ്രമിക്കുമെന്നും അവിടെ തന്നെ ഫീല്ഡ് നിന്നാല് മതിയെന്നുമായിരുന്നു സഹതാരങ്ങള്ക്ക് കോഹ്ലി നല്കിയ നിര്ദേശം. അങ്ങനെ തന്നെ അടുത്ത പന്തില് സംഭവിക്കുകയായിരുന്നു. കവര് ഡ്രൈവിനായി ശ്രമിച്ച് പ്രിയാന്ഷ് അടിച്ച ഷോട്ട് ക്രൂണാല് പാണ്ഡ്യയുടെ കൈകളിലെത്തുകയായിരുന്നു. പ്രിയാന്ഷിന്റെ വിക്കറ്റ് വിരാട് തന്നെയായിരുന്നു കൂടുതല് ആഘോഷിച്ചത്.
തുടര്ന്നങ്ങോട്ട് കൂട്ടതകര്ച്ചയാണ് പഞ്ചാബ് ബാറ്റിങ് നിരയില് സംഭവിച്ചത്. പ്രഭ്സിമ്രാന്, ശ്രേയസ് അയ്യര്, ജോഷ് ഇംഗ്ലിസ് തുടങ്ങി അവരുടെ പ്രധാന ബാറ്റര്മാരെല്ലാം കുറഞ്ഞ സ്കോറുകളില് പുറത്താവുകയായിരുന്നു. നിലവില് 9 ഓവര് പൂര്ത്തിയായപ്പോള് ഏഴ് വിക്കറ്റിന് 61 റണ്സ് എന്ന നിലയിലാണ് പഞ്ചാബ്.