ഐപിഎലിൽ ഇന്നലെ നടന്ന മത്സരത്തിൽ രാജസ്ഥാൻ റോയൽസിനെ അഞ്ച് വിക്കറ്റിന് പരാജയപ്പെടുത്തി സൺ റൈസേഴ്സ് ഹൈദരാബാദ്. രാജസ്ഥാൻ റോയൽസ് മുന്നോട്ടുവെച്ച 229 റൺസ് വിജയലക്ഷ്യം നാല് വിക്കറ്റ് നഷ്ടത്തിൽ 9 പന്തുകൾ ബാക്കിനിൽക്കെ ഹൈദരാബാദ് മറികടന്നു. രാജസ്ഥനായി വൈഭവ് സൂര്യവൻഷിയുടെ സെഞ്ചുറി പാഴായി.
ഹൈദരാബാദിനായി ഇഷാൻ കിഷൻ 57 റൺസും അഭിഷേക് ശർമ 74 റൺസും നേടി. നിതീഷ് കുമാർ 36 റൺസ് നേടിയപ്പോൾ ഹെൻഡ്രിച് ക്ലാസ ൻ 29 റൺസും നേടി. നേരത്തെ വൈഭവിന്റെ വെടിക്കെട്ട് സെഞ്ച്വറിയിലാണ് രാജസ്ഥാൻ 228 റൺസ് നേടിയത്. 37 പന്തിൽ 12 സിക്സറും അഞ്ച് ഫോറുകളും അടക്കം 103 റൺസ് നേടിയാണ് താരം മടങ്ങിയത്. 36 പന്തിലായിരുന്നു സെഞ്ച്വറി. ധ്രുവ് ജുറൽ 51 റൺസും ഡൊണോവൻ ഫെരേര 33 റൺസും നേടി. മത്സരശേഷം വൈഭവിന്റെ മികവിനെ പുകഴ്ത്തി സംസാരിച്ചിരിക്കുകയാണ് സൺ റൈസേഴ്സ് നായകൻ പാറ്റ് കമ്മിൻസ്.
‘നിലവിൽ എനിക്ക് ഏറ്റവും ഇഷ്ടമുള്ള ബാറ്ററാണ് വൈഭവ് സൂര്യവൻഷി. നല്ല രീതിയിലാണ് അവൻ ബോളുകൾ അടിക്കുന്നത്. വൈഭവിന്റെ ബാറ്റിംഗ് കാണാൻ നല്ല രസമാണ്” പാറ്റ് കമ്മിൻസ് പറഞ്ഞു.