ടി20 ലോക കപ്പിലേക്ക് സ്ഥാനമുറപ്പിച്ച താരങ്ങളിലൊരാളാണ് ശ്രേയസ് അയ്യര്‍. ഇന്ത്യയുടെ പ്ലെയിംഗ് ഇലവനില്‍ വരെ ഏറെക്കുറെ സ്ഥാനമുറപ്പിച്ച താരം എന്നാല്‍ ദക്ഷിണാഫ്രിക്കന്‍ പരമ്പരയില്‍ നിറംമങ്ങിയിരുന്നു. ഇപ്പോഴിതാ താരത്തിന്റെ വലിയൊരു വീക്കനെസ് ചൂണ്ടിക്കാട്ടി രംഗത്ത് വന്നിരിക്കുകയാണ് മുന്‍താരം മദന്‍ ലാല്‍. ശ്രേയസ് ഈ വീക്ക്നെസിനെ മറികടന്നില്ലെങ്കില്‍ ലോക കപ്പില്‍ കനത്ത തിരിച്ചടിയുണ്ടാവുമെന്നും അദ്ദേഹം മുന്നറിയിപ്പ് നല്‍കുന്നു.
‘ശ്രേയസ് അയ്യരുടെ ഏറ്റവും വലിയ ദൗര്‍ബല്യം ഷോട്ട് ബോളുകളാണ്. അവയ്ക്കെതിരേ കളിക്കുന്നതില്‍ താരം പരാജയമാണ്. ശ്രേയസിനു ഇതിനെ എങ്ങനെ മറികടക്കമെന്നതാണ് ചോദ്യം. അതിനുള്ള ഉത്തരം താരം തന്നെ കണ്ടെത്തുകയും എത്രയും വേഗത്തില്‍ പരിഹരിക്കുകയും വേണം.’
‘ശ്രേയസ് സെഞ്ച്വറിയടിച്ചാല്‍ ഓസ്ട്രേലിയക്കാര്‍ കൈയടിക്കും, പക്ഷെ അവര്‍ നിങ്ങളെ വെറുതെവിടില്ല. അവിടെ ഒരു ദയയും പ്രതീക്ഷിക്കേണ്ട. ശ്രേയസിനെതിരേ അവര്‍ ഷോര്‍ട്ട് ബോളുകളെറിഞ്ഞു കൊണ്ടേയിരിക്കും. നിലവിലെ സാങ്കേതിക വിദ്യകളുടെ സഹായത്താല്‍ ഏതു ടീമും എതിരാളികളെക്കുറിച്ചുള്ള ശക്തമായ ട്രാക്ക് സൂക്ഷിക്കും’ മദന്‍ ലാല്‍ മുന്നറിയിപ്പ് നല്‍കി.
ദക്ഷിണാഫ്രിക്കക്കെതിരായ ടി20 പരമ്പരയില്‍ വലിയ സ്‌കോറുകള്‍ നേടാന്‍ ശ്രേയസിനായിരുന്നില്ല. എന്നാല്‍ ഐപിഎല്ലിനു മുമ്പ് ശ്രീലങ്കയ്ക്കെതിരേ നടന്ന ടി20 പരമ്പരയില്‍ താരം ഹാട്രിക് അര്‍ദ്ധ സെഞ്ച്വറികള്‍ നേടിയിരുന്നു.
ടി20 ലോക കപ്പില്‍ ഇന്ത്യക്കു വേണ്ടി നാലാം നമ്പറില്‍ കളിക്കാന്‍ ഏറ്റവുമധികം സാധ്യതയുള്ള താരമാണ് ശ്രേയസ്. അതിനാല്‍ തന്നെ താരത്തിന്റെ പ്രകടനം ടീമിന് ഏറെ നിര്‍ണായകമാകും.