കാര്യവട്ടം സ്പോര്ട്സ് ഹബ് സ്റ്റേഡിയം വീണ്ടും അന്താരാഷ്ട്ര മത്സരത്തിന് തയ്യാറെടുക്കുന്നു. ഇതിനുള്ള ശ്രമങ്ങള് കേരള ക്രിക്കറ്റ് അസോസിയേഷന് തുടങ്ങി കഴിഞ്ഞു. സെപ്റ്റംബറില് ഇന്ത്യ- ഓസ്ട്രേലിയ മത്സരം ഇവിടെ കൊണ്ടുവരാനാണ് കെസിഎയുടെ ശ്രമം.
നേരത്തെ രണ്ട് ടി20യും ഒരു ഏകദിനവും 10 എ ക്ലാസ് മത്സരങ്ങളും നടന്ന സ്റ്റേഡിയമാണ് ഇത്. പോയ വര്ഷം ശ്രീലങ്ക, വിന്ഡീസ് ടീമുകള് ഇന്ത്യ സന്ദര്ശിച്ചപ്പോള് ഒരു മത്സരം ഇവിടെ അനുവദിച്ചെങ്കിലും കോവിഡ് കാരണം നഷ്ടമാവുകയായിരുന്നു.
കരസേന റിക്രൂട്ട്മെന്റ് റാലി, തെരഞ്ഞെടുപ്പ് പ്രചാരണറാലി എന്നിവയ്ക്ക് സ്റ്റേഡിയം വിട്ട് കൊടുത്തതോടെ ആകെ നശിച്ച അവസ്ഥയിലായിരുന്നു മൈതാനം. പിന്നീട് നശിച്ചുതുടങ്ങിയ ഭാഗങ്ങളെല്ലാം കേരള ക്രിക്കറ്റ് അസോസിയേഷന് നന്നാക്കിയെടുത്തു.
ഒന്നരകോടി മുടക്കിയാണ് കേരള ക്രിക്കറ്റ് അസോസിയേഷന് സ്റ്റേഡിയം പുതുക്കിപ്പണിതത്. ശേഷം പഴയപ്രതാപത്തിലേക്ക് സ്റ്റേഡിയം തിരികെ വന്നുകൊണ്ടിരിക്കുകയാണ്.