സൺറൈസേഴ്സ് ഹൈദരാബാദ് (SRH) ഉടമയായ കാവ്യ മാരൻ ഇന്ത്യൻ പ്രീമിയർ ലീഗ് (IPL) യിലെ ടീമിന്റെ മത്സരങ്ങളിൽ അവരുടെ സാന്നിധ്യം അറിയിക്കാറുണ്ട്. മത്സരങ്ങൾക്ക് ഇടയിൽ ഉള്ള നിമിഷങ്ങളിലെ അവരുടെ ആഘോഷവും, സന്തോഷം, സങ്കടവും ഒകെ കലർന്ന മുഖഭാവങ്ങൾ അടങ്ങുന്ന വീഡിയോ പെട്ടെന്നാണ് സോഷ്യൽ മീഡിയ ഏറ്റെടുക്കാറുള്ളത്. ഇപ്പോഴിതാ സമീപകാല റിപ്പോർട്ട് പ്രകാരം, കാവ്യയും പ്രശസ്ത സംഗീതസംവിധായകൻ അനിരുദ്ധ് രവിചന്ദറുമായി പ്രണയത്തിൽ ആണെന്ന റിപ്പോർട്ട് പുറത്തുവരുന്നുണ്ട്. 2012 ൽ പുറത്തിറങ്ങിയ ‘കൊലവേരി ദി’ എന്ന ഗാനത്തിന് ശേഷം അനിരുദ്ധ് സംഗീത പ്രേമികൾക്കിടയിൽ പ്രശസ്തനായി. വാർത്തകൾ പ്രകാരം, ഇരുവരും കുറച്ചധികം നാളുകളായി പ്രണയത്തിലാണ്.
ഇന്ത്യയിലെ ഏറ്റവും കൂടുതൽ പ്രതിഫലം വാങ്ങുന്ന സംഗീത സംവിധായകനാണ് നിലവിൽ അനിരുദ്ധ് രവിചന്ദർ. 1992 ൽ കാവ്യയുടെ പിതാവ് കലാനിധി മാരൻ സ്ഥാപിച്ച സൺ ഗ്രൂപ്പ് ബാനറിൽ നിരവധി ഗാനങ്ങൾ അദ്ദേഹം പുറത്തിറക്കിയിട്ടുണ്ട് എന്നതാണ് കൗതുകകരമായ വസ്തുത. അഞ്ച് തവണ ഐപിഎൽ ചാമ്പ്യന്മാരായ ചെന്നൈ സൂപ്പർ കിംഗ്സിനും (സിഎസ്കെ) വേണ്ടി നിരവധി പാട്ടുകൾ അനിരുദ്ധ് ചിട്ടപ്പെടുത്തിയിട്ടുണ്ട്. മാർച്ച് 23 ന് എംഎ ചിദംബരം സ്റ്റേഡിയത്തിൽ അനിരുദ്ധിന്റെ തകർപ്പൻ പ്രകടനത്തിന് ശേഷം, ഗായകന്റെ ആരാധകർ 34 കാരനെ മാരനുമായി ബന്ധിപ്പിക്കാൻ തുടങ്ങി.
അനിരുദ്ധ് ഭാഗമായ പല ഷോകളിലും കാവ്യയുടെ സാന്നിധ്യമാണ് ആരധകരുടെ സംശയം വർദ്ധിപ്പിച്ചത്. ഇത് സംബന്ധിച്ചുള്ള ചോദ്യങ്ങളോടൊന്നും ഇരുവരും ഇതുവരെ പ്രതികരണം ഒന്നും അറിയിച്ചിട്ടില്ല എന്നും ശ്രദ്ധിക്കണം.
അതേസമയം കാവ്യയുടെ ടീമായ സൺറൈസേഴ്സ് ഹൈദരാബാദിനെതിരെ ഇന്നലെ നടന്ന മത്സരത്തിൽ കൊൽക്കത്ത നൈറ്റ് റൈഡേഴ്സിന് 80 റൺസ് ജയം സ്വന്തമാക്കിയിരുന്നു. കൊൽക്കത്ത ഈഡൻ ഗാർഡൻസിൽ 201 റൺസ് വിജയലക്ഷ്യം പിന്തുടർന്ന ഹൈദരാബാദ് 16.4 ഓവറിൽ 120ന് എല്ലാവരും പുറത്തായി. മൂന്ന് വിക്കറ്റ് വീതം നേടിയ വൈഭവ് അറോറ, വരുൺ ചക്രവർത്തി എന്നിവരാണ് ഹൈദരബാദിനെ തകർത്തത്.