ക്രിക്കറ്റ് പ്രേമികളെ ഒന്നടങ്കം ഞെട്ടിച്ച് അന്താരാഷ്ട്ര ക്രിക്കറ്റില്‍ നിന്നും വിരമിക്കല്‍ പ്രഖ്യാപിച്ച് ദക്ഷിണാഫ്രിക്കന്‍ താരം ഹെന്റിച്ച് ക്ലാസന്‍. 33കാരനായ താരം തന്റെ സോഷ്യല്‍ മീഡിയ അക്കൗണ്ടിലൂടെയാണ് വിരമിക്കല്‍ ആരാധകരെ അറിയിച്ചത്. കുടുംബത്തിനും ഭാവിക്കും പ്രാധാന്യം നല്‍കാനാണ് ഈ തീരുമാനമെന്നാണ് താരം കുറിച്ചത്.
‘അന്താരാഷ്ട്ര ക്രിക്കറ്റില്‍ നിന്ന് വിരമിക്കാന്‍ തീരുമാനിച്ചതായി പ്രഖ്യാപിക്കുമ്പോള്‍ എനിക്ക് ഇത് ഒരു ദുഖകരമായ ദിവസമാണ്. എനിക്കും എന്റെ കുടുംബത്തിനും ഭാവിയില്‍ എന്താണ് ഏറ്റവും നല്ലതെന്ന് തീരുമാനിക്കാന്‍ വളരെ സമയമെടുക്കേണ്ടി വന്നു. അത് ശരിക്കും വളരെ ബുദ്ധിമുട്ടുള്ള ഒരു തീരുമാനമായിരുന്നു, പക്ഷേ എനിക്ക് പൂര്‍ണ്ണ സമാധാനത്തോടെ കഴിയുന്ന ഒന്നായിരുന്നു’, ക്ലാസന്‍ പറഞ്ഞു.
അന്താരാഷ്ട്ര ക്രിക്കറ്റില്‍ 60 ഏകദിന മത്സരങ്ങളാണ് ഹെന്റിച്ച് ക്ലാസന്‍ കളിച്ചിട്ടുളളത്. ഇത്രയും മത്സരങ്ങളിലെ 55 ഇന്നിങ്‌സുകളില്‍ നിന്നായി 2141 റണ്‍സ് ക്ലാസന്‍ നേടി. 174 റണ്‍സാണ് താരത്തിന്റെ ഉയര്‍ന്ന സ്‌കോര്‍. 43.96 ആണ് ശരാശരി. സ്‌ട്രൈക്ക് റേറ്റ് 117ഉം. 11 അര്‍ധസെഞ്ച്വറികളും നാല് സെഞ്ച്വറികളും ഏകദിനത്തില്‍ ക്ലാസന്‍ നേടി.
58 ടി20 മത്സരങ്ങളിലാണ് ദക്ഷിണാഫ്രിക്കയ്ക്കായി ക്ലാസന്‍ കളിച്ചത്. ഇത്രയും മത്സരങ്ങളില്‍ നിന്നായി 1000 റണ്‍സ് താരം നേടി. 141.85 ആണ് ടി20യിലെ ക്ലാസന്റെ സ്‌ട്രൈക്ക് റേറ്റ്. 23.26 ആണ് ശരാശരി. 81 റണ്‍സാണ് ടി20യിലെ ക്ലാസന്റെ ഉയര്‍ന്ന സ്‌കോര്‍. അഞ്ച് അര്‍ധസെഞ്ച്വറികളാണ് ഈ ഫോര്‍മാറ്റില്‍ നേടിയത്. ടെസ്റ്റ് ക്രിക്കറ്റില്‍ നാല് മത്സരങ്ങളില്‍ മാത്രമാണ് ക്ലാസന്‍ കളിച്ചിട്ടുളളത്. എട്ട് ഇന്നിങ്‌സുകളില്‍ ബാറ്റ് ചെയ്ത താരം 104 റണ്‍സ് നേടി. 35 ആണ് ഉയര്‍ന്ന സ്‌കോര്‍.
ഐപിഎലില്‍ രാജസ്ഥാന്‍ റോയല്‍സ്, റോയല്‍ ചലഞ്ചേഴ്‌സ് ബെംഗളൂരു, സണ്‍റൈസേഴ്‌സ് ഹൈദരാബാദ് തുടങ്ങിയ ടീമുകള്‍ക്കായി ക്ലാസന്‍ കളിച്ചു. 48 ഐപിഎല്‍ മത്സരങ്ങള്‍ ഇതുവരെ കളിച്ച താരം 1480 റണ്‍സ് നേടി. ഏഴ് അര്‍ധസെഞ്ച്വറികളും രണ്ട് സെഞ്ച്വറികളും ഐപിഎലില്‍ ക്ലാസന്‍ നേടി.